Konsehal Cadungog mi-resign

CEBU, Philippines – Miluwat sa iyang katungdanan si Tejero Barangay Councilor Jessielou Cadungog kay giingong wala na niya mahimo ang iyang responsibilidad isip konsehal.

Human sa piniliay, si Cadungog nagpadala og suwat kang Tejero Barangay Captain Hermogenes Galang Jr. niadtong Mayo 14 labot sa iyang pag-resign.

Iyang rason mao nga wala na siya makahimo sa iyang mga responsibilidad isip konsehal subay sa nahitabo kaniya niadtong Hulyo 30, 2018.

Ang maong suwat nadawat na sab sa Department of Interior and Local Government - Cebu City.

Girekomendar ni Cadungog nga mopuli kaniya mao si COSAP head Garry Lao, kinsa kanhi konsehal sa maong barangay. Apan si Lao nakadesisyon nga inay siya, ang kanhi SK Chairman nga si Almar Carl Amen ang iyang gituboy human niya makita nga angayan kini sa maong posisyon.

Kahinumduman nga niadtong miaging tuig, si Cadungog suway nga gibanhigan ug human sa hitabo, ni-file kini og unom ka buwan nga leave. Dihang napupos, iya kining gilugwayan og upat ka buwan. (/DILT)(BANAT NEWS)