Taytayan sa Minglanilla gibuksan

CEBU, Philippines — Gibuksan na ang 30-metros nga taytayan sa Barangay Guindaruhan, Lungsod sa Minglanilla.

Ang maong taytayan nga gipatrabaho sa Probinsiya sa Sugbo nagkantidad og P6.2 milyones.

Gihangyo kini sa kapitan sa barangay nga si Leonardo Mañacap sa Kapitolyo.

Ang maong taytayan mao ang nihulip sa karaan nga taytayan nga ginama sa kahoy diin mga gagmay nga sakyanan ra ang mamahimong makaagi.  Engr. Hector Jamora, pangulo sa Provincial Engineering’s Office, nagkanayon nga ang maong taytayan nagsumpay sa barangay road ngadto sa provincial road padulong sa main higgway sa Minglanilla. Ang pag-turnover sa maong taytayan gitambongan ni Gobernador Hilario Davide III, Jamora, ug mga opisyal sa barangay ug dili momenus 100 ka residente sa Guindaruhan.

Ang mga residente nahinangop sa maong pagka-ugmad sa taytayan sanglit kun kaniadto mahadlok sila moagi, karon dili na ug makalusot na nga walay kabalaka. (/GMR)(BANATNEWS)