Kapin 100 ka live-in partners gikasal

CEBU, Philippines — Sobra sa 100 ka live-in partners ang nakasal pinaagi sa Christian Life Program sa Couples for Christ (CFC) - Cebu Chapter.

Si Victoriano Mayor, ang provincial area director sa CFC-Cebu, nidason nga mao kini ang usa sa main highlights sa ilang 29th anniversary.

Ang CFC-Cebu nagselebrar sa ilang anibersaryo karong tuiga, ug kagahapon nagkatapok ang sobra sa 12,000 ka miyembro sa maong organisasyon sa Cebu City Sports Center alang sa usa ka dakung kalihukan.

Si Mayor nagkanayon nga kagahapon unta ipahigayon ang usa ka daku nga mass wedding apan wala nisugot ang kadagkuan sa simbahan tungod kay alang nila, mas maayo kun makasal sila sa simbahan.

Mao nga ang mass weddings gibuhat sa matag parokya, dugang niya.

Matud niya nga gikan sa Enero hangtud karong buwana, adunay gatusan ka live-in partners ang natabangan nila nga nakasal ug labi na nga nakadawat sa “sacred vows” sa Santos nga Misa.

Si Mayor niingon nga ang maong live-in partners gidawat sa CFC-Cebu bisan dili sila pormal nga managti-ayon ug gipasulod nila sa ilang Christian Life Program.

Human nila makompleto ang maong programa, siya nagkanayon nga ang CFC Ministry motabang nila dili lang sa espiritwal nga aspeto apan apil na sa pinansyal nga gastuhan sa pagkuha og mga dokumento aron sila makasal.

Matud ni Mayor gihatagan nila og gibug-aton ang sakramento sa kaminyoon tungod kay mas importante nga madawat sa managtiayon ang bendisyon sa Ginoo aron sila magmalungtaron sa ilang panagpuyo. (/GMR)(BANATNEWS)