Llenes: ‘Not guilty your honor’

CEBU, Philippines – Ang suspetsado sa pagpatay ug pagpanit sa nawong sa dalagitang kolektor sa simbahan nga si  Christine  Lee Silawan mi-plead not guilty sa kasong murder nga iyang giatubang atol sa unang adlaw paghusay sa iyang kaso kagahapon  diha sa sala ni Judge Christine Muga-Abad sa Branch   70 sa Regional Trial  Court (RTC) 7 sa Dakbayan sa Lapu-Lapu.

Ang iyang abogado nga si Atty. Manuel Degollacion Jr. mikumpirmar sa wala pag-angkon ni Renato Llenes sa maong krimen kay miinsister kini nga aksidente lamang ang nahitabo maong homicide ug dili murder ang kaso untang ipasaka batok kaniya.  Dugang pa niya nga ang pag-plead not guilty ni Llenes mao lamang ang paagi nga mapresentar nila ilang argumento nga dili tinuyo ang nabuhat  sa akusado ngadto sa dalagita.

Malaumon si Degollacion nga mapakubsan gikan sa kasong murder ngadto nalang sa homicide ang giatubang sa iyang kliyente ug siya siguradong angkunon kini ni Llenes.

Matud pa sa abogado nga  ang gihimo sa iyang kliyente dili delaying tactics  tungod kay buot lamang niini nga mas ubos ang silot kun mahukman kini sa kasong homicide.

Kahinumdoman nga si Llenes atubangan  sa mga opisyal sa kapolisan, mga tigbalita ug abogado gikan sa Public Attorney’s Office (PAO) iyang giangkon ang salaod nga iyang nabuhat kang Silawan.

Miluwat sab siya og extra-judicial confession sa iyang pag-angkon sa krimen.  Siya mitug-an nga nagkauyab silang Silawan pinaagi sa Facebook.

Matud niya, nigamit siya og dummy account ug nagpakaaron-ingnong usa siya ka batan-on nga ginganlan og CJ Diaz sama ni Silawan mao nga nagkauyab silang duha.

Hangtud nga nagsabot silang “mag-eye ball” sa labing unang higayon sa gawas sa simbahan sa Sacred Heart Parish sa Pajac, Dakbayan sa Lapu-Lapu niadtong Marso 10 niining tuiga.

Si Silawan kolektor sa limos sa maong simbahan, matud ni Llenes nakugang pagkakita kaniya ang dalagita kay wala kini magtuong tiguwang na siya. Giangkon sab ni Llenes nga high kini sa illegal nga drugas sa dihang iyang napatay ang biktima tungod sa pagdumili niini sa gusto niyang buhaton sa dalagita diha sa bakanteng luna sa Sitio Mahayahay, Barangay Bangkal.

Giangkon sab niya nga human niya napatay si Silawan gipanitan niya ang nawong niini gamit ang gunting. Ang Deputy City Director for Operations sa Lapu-Lapu City Police Office (LCPO) Lt. Colonel David Señor, nagkanayon nga wala sila nasurpresa sa pag plead not guilty ni Llenes. Miingon si Senor nga katungod sa suspek nga usbon ang huna-huna ug sa pag plead not guilty sa kasong murder.

“We are not surprised sa iyang desisyon, isa man sad na sa atoang na-anticipate nga posibilidad. Bisan pa man mopadayon ang kaso because we believe na sakto ang ebidensya nga nakuha against niya,” sigon pa ni Señor. Sa lain bahin, ang direktor sa National Bureau of Investigation-7 , Tomas Enrile nagkanayon nga wala na sila’y kalambigitan sa kaso ni Silawan human ma-dismiss ilang kaso batok sa 17-anyos nga kanhi uyab sa biktima nga maoy ilang gisikop. “Since na dismiss na ng fiscal ang kaso, wala na kaming participation because they said na mas matibay ang sa pulis, and nag-lapse na din ang time for us to file a motion kaya wala, hands-off na kami diyan,” sigon pa ni Enrile.

Mahinumduman nga napalgang patay si Christine, niadtong Marso 11 sa bakante nga lote sa Barangay Bankal, Lapu-Lapu nga gipanitan ug wala na’y sinina. Paglabay sa usa ka buwan nadakpan si Llenes sa kapulisan human nakuhaan sa illegal nga armas ug siya mismo ang mitug-an nga siya ang nipatay ni Silawan.(Mae Clydyl Avila/IBM)(BANAT NEWS)