Briton napalgan naglutaw sa dagat patay

CEBU, Philippines — Usa ka 57-anyos nga Briton napalgang naglutaw-lutaw sa kadagatan sa Barangay Balod, Lungsod sa Dalaguete niadtong Huwebes sa hapon.

Ang Briton giila sa pangalan nga Ian Parkinson sa iyang higala nga si Howard Philip, 63, human kini gibitik pabalik sa baybayon.

Sigun ni Police Master Sergeant Arnold Frenal, desk officer sa Dalaguete Police Station, nga ang maong mga turista nag-snorkel sa duol nga fish sanctuary.

Ang fish sanctuary adunay gilay-on nga 700-metros gikan sa baybayon.

Usa ka mananagat ang nakakita sa patayng lawas sa tawo ug nipahibawo ngadto sa kapolisan.

Gidala sa Alcantara Provincial Hospital si Parkinson apan ang medical personnel nga nisusi niingon nga patay na kini. (/GMR)(BANATNEWS)