Walo ka school bus wala i-renew ang permit
CEBU, Philippines – Nikabat sa walo ka school bus ang wala na tugoting maka-renew sa ilang prangkisa tungod kay nilapas na kini sa age limit nga gitagal niini.
Ang pangidaron sa maong mga bus nasuta human sa gipahigayong inspection sa Land Transportation Franchising and Regulatory Board (LTFRB)-7 sa mga school bus nga gisugdan niadtong Lunes.
Si LTFRB-7 regional director Eduardo Montealto, Jr. nibutyag nga niadtong Lunes nagsugod sila sa pag-inspection sa mga school bus nga nag-renew sa ilang prangkisa diin ilahang gitan-aw ang road worthiness niini, adunay fire extinguisher, dash camera, Close Circuit Television (CCTV), Wi-Fi ug GPS tracker.
Matud ni Montealto nga walo ka units ang wala na nila hatagi og permit nga makadagan tungod kay nilapas na kini sa gikatakda nga age limit.
Ang bus type nga sakyanan ang age limit niini nga padaganon sulod sa 15 ka tuig ug ang van type sulod sa 13 ka tuig.
Gikinahanglan nga kompleto ang rekisitos sa school bus aron kini mahatagan og permit.
Dugang ni Montealto nga pahugtan sa LTFRB-7 ang pagsusi sa mga school bus hangtud sa Hunyo 20 niining tuiga ug magpadayon gihapon kini human sa maong petsa isip kabahin sa ilang regular nga activity. (/BDB)(BANAT NEWS)
- Latest
