Team Deretso nanumpa

CEBU, Philippines — Liboan ka dumadapig gikan sa kabarangayan sa Dakbayan sa Lapu-Lapu ang nitambong sa gipahigayong  oath taking ceremony sa mga nidaog  nga kandidato sa Team Deretso nga naglakip ni outgoing mayor ug incoming congresswoman Paz Radaza.

Ang lider sa Team  Deretso  nga si kanhi kongresista Arturo Radaza ug outgoing vice  mayor Harry  Radaza  kauban sa opisyales sa barangay ug ilang  mga dumadapig ang nisaksi sa nahisgotang kalihokan.

Ang napulo ka sakop sa konseho kinsa nidaog sa Team  Deretso nanumpa kang Association Barangay Council Federation President  Eduardo  Cuizon.

Naglakip sa pipila ka mga nidaog nga konsehal sa Team Deretso nga nipadayag sa ilang hugtanon nga suporta mao sila si  Marcial Ycong, Queenie Malingin,   Dongdong Berdin, Jeo Dungog, Efren Herrera,  Junrey Gestopa, Rex Magubat ug  Epoy Paquibot.

Nihimo usab sa ilang pagpanumpa ang opisyales sa 30 ka barangay sa dakbayan nga naglakip sa mga barangay kapitan ug barangay konsehal nga gipangulohan  ni Cuizon ug  gisundan usab sa mga Sangguniang Kabataan (SK) nga gipangulohan sa ilang SK Federation President nga si Lyka Tampus.

Samtang si incoming congresswoman Radaza, gitagsatagsa niini sa paghisgot ang mga kaayohan nga iyang nahimo isip mayor sa dakbayan nga nikabig og daghang kapitalista sa pagbutang sa ilang negosyo sa dapit nga nagsilbi na karon nga The Historic Resort City  dinhi sa Sugbo. (/BDB)(BANATNEWS)