Basura sa kasapaan ug kadagatan nagkadaghan

CEBU, Philippines — Giila ang buwan sa Mayo nga Ocean Month, mao nga ang Cebu City Environment and Natural Resources Office (CCENRO) nagpahigayon og clean-up operation sa coastal area ug kasapaan sa siyudad.

Sa coastal area, sa kabaybayonan sa South Road Properties mihimo og pagpanglimpyo ang CCENRO uban sa Philippine Coast Guard niadtong miaging adlaw diin ubay-ubay nga basura ang ilang nakuha, diin sagad niini mga plastic ug uban pa.

Gani miabot sa tulo ka trucks ang nagamit sa paghakot sa mga basura, o 10 ka toneladang basura ang nahakot.

Miabot sa 40 ka tawo ang gipadala sa PCG aron motabang sa usa ka gatus ka mga Barangay Environmental Officers (BEOs) sa CCENRO.

“Naa gihapoy kadaghanan gyud sa basura naa paingon sa kadagatan gikan sa sapa labi na bag-o to nag-ulan so grabe kaayo, wala maato sa among paglimpyo sa sapa adto paingon sa dagat so mao nay problema”, sigon sa pangulo sa CCENRO nga si Nida Cabrera.

Samtang gipahibawo sab niiini nga nagsugod na sila sa ilang Food for Work Program diin ang ilang buhatan manghatag og tulo ka kilong bugas ug unom ka de lata sa mitabang kanila paglimpyo sa coastal areas ug kasapaan, gikan sa alas 7:30 sa buntag hangtud sa alas 11:30 sa buntag.

Sa pagkakaron ang CCENRO adunay nahibilin nga 80 ka sakong bugas ug 2,000 ka mga sardinas ug 2,000 sab ka beefloaf. Gitinguha sa CCENRO nga malimpyohan ang mga kasapaan sa Bulacao, Tejero, Tinago ug T. Padilla diin adunay tag kinse ka tawo ang manglimpyo. (DILT) (BANAT NEWS)