50 mil ka plaka gipugngan sa LTO-7
CEBU, Philippines — Moabot 50 mil kapin ka mga plaka sa sakyanan ang wala gipadala dinhi sa Sugbo sa kadagkuan sa Land Transportation Office-7 tungod kay hangtud karon aduna pay 30 mil kapin ka mga plaka sa sakyanan gikan sa Hunyo 2017 ngadto sa Mayo 2018 nga wala pa makuha sa mga tag-iya.
Matud pa ni Land Transportation Office 7 Regional Director Victor Caindec nga nahinabi sa Banat News hangtod karon aduna pay 30 mil kapin ka mga plakang wala kuhaa sa mga tag-iya bisan ug gipangbilin na kini sa mga dealers tungod kay walay panahon ug busy ang mga nanag-iya niini.
Sumala pa ni Caindec, andam na usab unta ang ang laing mga plaka nga 50 mil kapin gihapon alang sa May 2018-2019 apan ilaha usa kining gipugngan ang pagpadala tungod kay aduna pay daghan wala makuha gikan sa unang hugna. Gitug-an ni Caindec, ilaha hatagan og kahigayon ang mga wala pa makakuha sa ilang mga plaka pagkuha niini una sila mohatag unya sa deadline.
Siya mipasidaan nga kung madakpan ang mga sakyanan nga walay hustong plaka pamultahon na gyud ang drayber.
Ang rehiyonal nga direktor nitug-an wala sila nagkulang sa pagpahibalo nga available na ang maong mga plaka apan ang mga nanag-iya lang gayud niini ang nagmagahi sa pagkuha.
Gipahibalo usab ni Caindec nagpaabot nalang usab sila sa approval sa alang sa desinyo para sa plaka sa motor. IBM (BANAT NEWS)
- Latest
