P2M shabu nasakmit sa kapolisan
CEBU, Philippines – Dul-an sa P2 milyones nga gidudahang shabu ang nasakmit sa kapulisan sa Siyudad sa Sugbu sa duha ka managlahing operasyon batok ilegal nga drugas.
Apil sa nasikop mao ang gipasanginlan nga down-line ni Eddie Basillote, ang gikataho nga gikulata sa walo ka polis sa Talamban sa usa ka viral video.
Nailhan kining suspetsadong pusher sa illegal nga drugas nga si, Florentino “Eglo” Solon, 29, nagpuyo sa Barangay Carreta.
Sigon pa ni Police Major Dindo Juanito Alaras naapil sa ilang monitoring si Solon kay ilang nasuta nga sakop kini sa drug network ni Basillote.
Usa ka buy-bust operation sa sulod sa Chinese Cemetery sa Barangay Carreta, niadtong Biyernes sa kaadlawon ang gihimo ug didto nadakpan si Solon nga nakuhaan og 63 gramos nga gituohang shabu nga nagkantidad og P484,400.
Matud ni Alaras, bag-ohay pang nakagawas sa prisohan si Solon tungod sa kaso sa illegal possession of firearms. Si Solon suspect sab sa mga kaso sa pagpangawat. “Bag-o pa ni siya sa drugas, kay sa una tulis man ni iya. Apil ni siya sa downline ni Basillote,” si Alaras miingon. Sa laing bahin ang Punta Princessa Police Station pinangulohan ni Police Major Keith Allen Andaya nakasakmit og P1,292,000 nga gidudahang shabu gikan sa mga suspek nga silang Burt De Villa Batotol, 36, ug Marvin Rivera Juagarap, 21.
Si Andaya miingon nga si Batotol ra ilang target apan nasikop pud nila sa Juagarap tungod kay na-identify kini nga runner. (/IBM)(BANAT NEWS)
- Latest
