Laundry shop nasunog sa Camputhaw

CEBU, Philippines — Miabot sa P200 mil ang danyos sa sunog nga miulbo sa usa ka commercial building sa may Barangay Camputhaw, Dakbayan sa Sugbo, Sabado sa buntag.

Ang sunog nadawat sa kabomberohan alas 7:12 sa buntag ug giisa sa second alarm alas 7:22 ug nakontrolar alas 7:30.

Ang sunog nagsugod sa establisemento nga gipanag-iya ni Ferdinand Jakosalem diin apektado ang usa ka laundry shop.

Matud ni Fire Officer Grace Colina, sa Cebu City Fire Station, ang sunog nagsugod sa dryer sa laundry shop human mi-leak ang LPG accumulation niini. Dugang ni Colina nga usa ka Maricel Arnais ang nakaangkon og paso atol sa sunog kinsa anaa na karon sa tambalanan.

Nagpadayon pa ang gihimong imbestigasyon sa kabomberohan labot sa maong sunog. (/DILT)