BRT nag-agad sa desisyon sa bag-ong administrasyon

CEBU, Philippines — Ang desisyon sa kaugmaran sa Bus Rapid Transit Project nahimutang sa umaabot nga administrasyon sa kagamhanan sa Dakbayan sa Sugbo ug sa Department of Transportation matud ni city administrator Nigel Paul Villarete.

Si Villarete naglaom nga ang umaabot nga administrasyon ni mayor-elect Edgardo Labella mopadayon sa proyekto.

Si Labella sa iyang bahin, nagkanayon nga sa iyang pag-asumer sa buhatan karong Hunyo 30, ang iyang administrasyon motuon ug mo-review sa pagpatuman sa proyekto.

Matud ni Villarete nga ang maong proyekto gitun-an ug gituki sa nilabay nga 10 ka tuig.

Sa niaging tuig, ang DOTr ug ang Office of the Presidential Assistant for the Visayas head Michael Lloyd Dino nipakanselar sa proyekto tungod sa kahuot sa kadalanan sa siyudad.

Apan ang National Economic and Development Authority miaproba sa proyekto tungod kay giingong feasible ug viable kini.

Gi-apil sa DOTr ang BRT sa Integrated Inter-Modal Transport System (IITS) alang sa Metro Cebu nga nagtumong sa pagpauswag sa sitwasyon sa trapiko.

Si Villarete nipadayag nga naglaom usab siya nga ang DOTr mobarug sa desisyon nga maduso ang BRT uban sa laing mga proyekto sa transportasyon ug imprastraktura sa IITS.

Matud usab ni Villarete nga ang P16 bilyones nga budget alang sa BRT dili mahimong gamiton alang sa ubang mga proyekto tungod kay kini usa ka loan. (/BDB)(BANATNEWS)