Kaso ni Kap. Abellana gibalik sa konseho
CEBU, Philippines – Giawhag sa Ombudsman ang konseho sa Siyudad sa Sugbo nga aksyonan ang suwat ni Mambaling acting Barangay Captain Anne Marie Vestil Palomo labot sa giingong wala pagsunod sa suspendidong kapitan nga si Gines Abellana nga mokanaug sa pwesto.
Sa suwat nga pinetsahan og Pebrero 26 alang kang Bise Mayor Edgado Labella, ang Ombudsman nipadangat sa suwat ni Palomo ngadto sa konseho.
“Advice of the action taken on the matter direct to Acting Punong Barangay Palomo within five (5) days from receipt thereof, copy furnished this Office, is highly appreciated,” tipik sa suwat sa Ombudsman.
Niadtong Enero 25, si Palomo nipadala og suwat sa Ombudsman labot sa padayon nga paglingkod ni Abellana sa katungdanan bisan kini gisuspenso.
Sa suwat gidetalye ni Palomo nga si Abellana padayon nga nag-isyu og barangay clearances, nagpahigayon og meeting sa barangay workers, mag-post og memorandum nga naglatid nga si Palomo giingong “unofficial” acting Barangay Captain ug uban pa.
Enero 8 gisuspenso sa konseho sa siyudad si Abellana sulod sa 24 ka buwan gumikan sa giingong wala pag-release sa honoraria nila ni Palomo ug laing tulo ka barangay konsehal gikan sa Hulyo hangtud Disyembre 2018.
Sila si Palomo, Edwil Managbanag, Victoriano Laborte ug Neonita Cuesta ang nisang-at og reklamong abuse of authority batok ni Abellana.
Subay sa suwat sa Ombudsman, si Palomo malaumon nga ang konseho sa siyudad motuki niini sa ilang sesyon samtang si Abellana ang wala pa nikanaug sa katungdanan. (/GMR)(BANAT NEWS)
- Latest
