Sa dalaga, ulitawo

CEBU, Philippines – Kapin sa P2.1 milyones nga balor sa drugas ang nasakmit gikan sa duha ka dinakpan atol sa buy-bust operation sa kapolisan sa Sitio Cekalco, Barangay Labangon, Dakbayan sa Sugbo niadtong Martes sa hapon.

Ang nangasikop mao sila si Claire Villahermosa, 19, dalaga, ug Joshua Barba, 20, ulitawo, pulos walay trabaho nga taga Sitio Sto. Rosario sa maong barangay.

Ang hepe sa Cebu City Police Office (CCPO) Station 10, Police Major Keith Allen Andaya, maoy nangulo sa operation.

Nasakmit gikan sa mga dinakpan ang pinutos nga gituohang shabu nga motimbang og 315 gramos nga mobalor og P2,142,000 base sa Dangerous Drugs Board (DDB) value, buy-bust money ug sling bag nga gisudlan sa drugas.

Ang mga dinakpan kasamtangan na karon nga gitanggong sa prisohan samtang giandam pa ang pagsang-at sa tukma nga kaso. (/GMR)(BANAT NEWS)