Kaliboang supporters sa Barug mipakita

CEBU, Philippines – Gibanabanang 25,000 kapin ka dumadapig ang mitambong sa miting de avance sa Partido Barug –PDP Laban nga gipangulohan ni Cebu City mayoral candidate Vice Mayor Edgardo Labella diha sa dalan C. Padilla niadtong Miyerkules sa gabii. Ang pangulo sa San Nicolas Police Station Police Major Kenneth Albotra miingon nga libuan ka mga indibidwal ang miokupar sa kinatibuk-an sa dalan C. Padilla.  Mga alas 7 sa gabie nag-abot-abot ang mga dumadapig sa venue nga nagsul-ob og campaign shirts sa mga kandiadto sa Partido Barug.

Duna say pipila ka mga indibidwal ang nakit-an nga nagdala og posters nga dunay suwat, “Sibat na Tomas Osmeña, Puli na Edgar Labella.”

Bisan si Labella nahingangha sa kadaghan sa mga nanambong ug dako kaayo ang iyang pasalamat sa ilang suporta.

“My description is that it is very heartwarming, wala man mi manghakot, wala mi manghatag og kwarta.

Mao man gani na nga among gisugdan og alas 8 para dili nami makapakaon intawon. As far as the mountain barangays niabot dinhi, as far as our barangays from the North niabot, wala mi mangahatag and hakot,” sigon ni Labella. Si Labella misaad nga iyang tugbangan og tinarong ug sinserong serbisyo  kining gipakitang suporta sa iyang mga supporters kun siyay palaron.

Uban nila ni Labella ug vice mayoral candidate kanhi mayor Michael Rama ang ilang mga kandidato pagka-Konsehal sa South District Donaldo Hontiveros, Phillip Zafra, Erik Espina, Francis Esparis, Gerard Carillo, Renato Osmeña Jr., Eduardo Rama Jr., Antonio Cuenco ingon man sa North District nga sila si Niña Mabatid, Rey Lauron, Ernest Herrera, Noel Wenceslao, Ramil Ayuman, Joel Garganera, Pastor Alcover Jr., ug Raymond Alvin Garcia.

Nitambong sab ang mga kandidato pagka-kongresista sa South District Jocelyn Pesquera ug sa North District Richard Yap.

Tagsatagsa silang nakapaabot sa ilang mensahe aron awhagon ang mga botante nga suportahan sila. Apil sab sa mitambong ang ig-agaw ni Rama nga si Annabelle Rama ug pamilya niini nga mihangyo nga suportahan ang partido Barug.

Si Labella, mipaambit bahin sa pagpatawag kaniya ni Presidente Rodrigo Duterte niadtong Lunes didto sa Malacañang nga diin siya giendorsar niini pag-usab. Ang katawhan nitubag pinaagi sa pagsinggit og “Yes! Daog na. Daog na basta wala’y tikas.”

Gihisgutan sab ni Labella nga ang Presidente gusto mopadayon sa implementasyon sa Light Rail Transit ug ang Low- Cost Housing Program alang sa urban poor. (/IBM)(BANAT NEWS)