Gikulata, gibuboan og init nga sabaw

CEBU, Philippines – Inahan sa gikulata-patay sa kapuyo giingong dili na desididong mopasaka og kaso batok sa suspek mao nga ang kapolisan na maoy moduso og pormal nga reklamo ngadto sa korte.

Nagbangutan karon ang upat ka mga lalaking anak sa napatay nga si Maria Theresa Umagac, 43-anyos, residente sa Good Shepherd, Banawa, Brgy. Guadalupe, Dakbayan sa Sugbo.

Si Umagac gikulata ug gibuboan og init nga sabaw sa iyang kapuyo nga si Raul Micolob Quecho, 45-anyos sulod sa ilang panimalay.

Sa report sa GMA News, ang 15-anyos nga kamaguwangang anak sa managkapuyo buot nga mahatagan og hustisya ang kamatayon sa ilang inahan human kulataha ug gisabyagan pa gyud og gisiliang init nga sabaw.

Apan sigon sa hepe sa Guadalupe Police Station, Police Captain Dexter Basirgo nga mibabag ang apohan sa mga bata sanglit matud pa nga kon ipapriso ang suspek, wala nay moatiman sa mga bata.

“Naglisud mi og kuha og additional testimonies kay ultimo ang inahan sa biktima, nagdumili sa pag-file og kaso. In fact, nipirma siya og waiver nga di na ipa-autopsy ang iyang anak,” sigon ni Basirgo.

Giingong dili sab nila magamit sa korte ang statement sa 15-anyos nga anak nga nakasaksi sa krimen sanglit walay guardian nga mipirma.

Hinuon nagamit kining giya alang sa imbestigasyon ug pagpanguha og dugang ebidensiya.

Sa inisyal nga imbestigasyon, problema sa kwarta ug selos ang gitan-aw nga hinungdan sa away sa maglive-in partner.

Ang Guadalupe Police na ang magsilbing complainant sa kaso ug sigon sa hepe nga bahala na ang prosekyutor sa pagtimbang-timbang sa kaso. (/DILT)(BANAT NEWS)