Nag-angkoraheng mga barko wa magbayad

CEBU, Philippines — Mga barkong nag-angkorahe sa kadagatan sa Siyudad sa Talisay ang nakapahimulos kay wala magbayad sa kagamhanan.

Si Konsehal Antonio Bacaltos Jr., kinsa maoy chairman sa committee on Environment sa siyudad miingon nga dugay na nilang naobserbahan nga daghang barko ang makita sa mga Talisaynon diha sa ilang kadagatan.

Gani ang nahitabo nga oil spill sa kadagatan sa Brgy. Poblacion gituohan man nga usa sa mga barko nga nag-angkorahe maoy responsible niini.

Si Bacaltos mibutyag nga tuyo gyud unta niya nga maningil sa mga nanag-iya sa maong mga barko apan sa iyang pagbisita sa Cebu Port Authority (CPA), siya giingnan nga ang maong buhatan lang ang makapangayo og anchorage fee.

Hinungdan nga siya mitataw nga ang usa ka Local Government Unit (LGU) makapangayo og balayrunon ngadto sa nanag-iya sa barko og environemental fee sama sa gibuhat sa duha ka silingang mga siyudad.

Gani sa pagbalik ni Bacaltos sa buhatan sa CPA aron sundon ang gihimo sa duha ka dakbayan, siya gibalibaran nasab sa maong opisina kay gidili wala kini sa balaud.

Gani ang duha ka naasoyng siyudad nga nangayo og environmental fee, pasakaan og kaso sa CPA.

Dugang pa ni Bacaltos nga bisan paman niini, dili siya mohunong sa pagsusi kon unsa nga lakang ang ilang buhaton aron makabayad ang mga barko nga nagpahimulos sa kadagatan sa siyudad. (/DILT)(BANATNEWS)