Hapit patya sa iyang mga ig-agaw

CEBU, Philippines — Buot patyon sa iyang upat ka mga ig-agaw ang 32-anyos nga lalaki ug hapit maangin ang tulo ka mga anak niini.  Nahitabo ang insidente sa Brgy. Salagmaya, bukirang dapit sa Lungsod sa Alcantara niadtong Huwebes sa alas otso sa gabii.

Giila ang biktima nga si Joseph Gabia Templado samtang gipugngan ang mga pangalan sa tulo niya ka mga anak nga nag-edad og 6 ngadto sa kwatro anyos.

Samtang ang mga suspek nga ig-agaw sa biktima mao ang managsuong Camporedondo nga sila si Romeo,  Arnel, Joel ug Richie.

Sigon sa hepe sa Alcantara Police Station nga si Police Captain Brendo Joel Bariarmente, migikan sa ilang panimalay si Joseph aron unta tagbuon ang iyang bayaw nga naabot. Apan wala pa gani siya nakalayo sa ila, giatngan siya sa iyang mga ig-agaw kinsa mga armado og bolo, lantaka, ug mga bato.

Gigukod si Joseph sa maong mga suspek hinungdan nga mibalik na lang siya sa ilang balay.

Giingong hapit madakdaki sa bato nga gipanglabay sa mga suspek ang 4-anyos nga anak ni Joseph.

Giingong nakasulod na unta sa balay ang mga suspek ug may na lang kay naabot ang ilang barangay kapitan ug ubang mga silingan aron mahunong kini. Nadakpan sa kapolisan ang tulo samtang gipangita pa si Richie.

“Away sa pamilya kuno ni, dugay na ni nga away nila,” sigon sa hepe.

Kasong attempted murder in relation sa child abuse ug laing attempted murder ang kasong giatubang karon sa magsuong suspek. (/DILT)(BANATNEWS)