DILG ni-served sa preventive suspension ni Gica

CEBU, Philippines – Hingpit na nga napaubos sa preventive suspension ang mayor sa Lungsod sa Dumanjug Efren Guntrano “Gungun” Gica.

Pasado alas 4:00 sa hapon niadtong Miyerkules na-served sa provincial director sa Department of Interior and Local Government (DILG) Jerome Gonzales ang 90 ka adlaw nga preventive suspension batok kang Gica nga giluwatan sa Sandiganbayan 4th division.

Ang maong preventive suspension kalabutan sa kasong kriminal nga giatubang ni Gica kabahin sa giingong pagpaburot niini sa kantidad sa bayranan sa usa ka restaurant sa Dakbayan sa Sugbo niadtong tuig 2014 dihang siya pa ang bise mayor sa lungsod.

Ang Sandiganbayan 4th division ni-rule kini niadtong Abril 3 subay sa gihimong imbestigasyon niini sa kaso batok kang Gica nga kalapasan sa Akta Republika 3019 kun “Anti-Graft and Corrupt Practices Act”.

Ang bise mayor sa lungsod nga si Rene Asentista maoy mahimong acting mayor ug ang first councilor nga si Ceasar Baricuatro maoy mahimong acting vice mayor.

Matud ni Gonzales nga iyahang giabisohan si Baricuatro nga magsulat ngadto sa DILG kalabot sa iyang paglingkod isip bise mayor sanglit kinahanglan pa kini nga i-designate.  Ang 90 ka adlaw nga preventive suspension ni Gica molungtad kini hangtud mahuman na ang election.

Si Gica mopasubli kini og papili sa samang posisyon karong umaabot eleksiyon sa Mayo 13.

Ug matud ni Gonzales nga kong makadaog kini kinahanglan siya nga mosulat ngadto sa Sandiganbayan aron siya masayod kun ang iyang suspension epektibo pa ba gihapon bisan kon nahatagan kini og laing termino isip mayor sa lungsod. (/BDB)(BANAT NEWS)