Adunay adjustment sa seguridad sa piniliay

CEBU, Philippines – Kapolisan adunay himuong adjustment sa security preparation sa eleksyon ilabi na ang kadtong mga lugar nga gi-downgrade sa election watch list areas (EWAS) category matud ni Police Regional Office-7 director Police Brigadier General Debold Sinas.

Apan giingong ila usa kining paaprubahan sa Commission on Elections nga maoy pangulo sa Joint Peace and Security Coordinating Council (JPSCC). “Gi-adjust lang namo, the basic deployment is at least two PNP per voting centers except for Siquijor, ang uban nga daghang threats, dugangan og tao,” sigon sa maong heneral.

Karong adlawa magpahigayon sila og katapusang meeting diin lakip sab sa ilang hisgotan mao kon kanus-a dalhon ang mga vote counting machine, mga balota ingon man sa deployment.

Sa inisyal nga plano, giingong buot sa heneral nga ipakatap na ang ilang pwersa karong Mayo 5 ug isang-at nila ang ilang full alert status alang sa nagsingabot nga piniliay. Samtang, andam na ang Regional Election Monitoring and Action Center-7 sa PRO-7 diin nahimutang sulod sa ilang kampo sa Camp Sergio Osmeña Sr.

Ang REMAC maoy magsilbing monitor sa kapolisan sa tibuok Central Visayas, samtang nagpahigayon ang piniliay. Diin ang tanang mga alarma ug mga insidente adto morehistro sa REMAC.

Kon pananglitan daghang insidente kalabot sa eleksyon ang mahitabo sa usa ka lugar, hayan dugangan sa PRO-7 ang pwersa sa maong dapit. (/DILT)(BANAT NEWS)