Direktor sa NPPO nakabalik na, BPPO dunay bag-ong direktor

CEBU, Philippines – Girelibohang direktor sa Negros Oriental Provincial Police Office nga si Police Colonel Raul Tacaca gibalik na sa pwesto human natapos ang gihimong imbestigasyon kabahin sa pagkapatay sa mga gituohang miyembro sa New People’s Army didto sa Negros Oriental.

Gipahibawo sa direktor sa Police Regional Office (PRO)-7 Police Brigadier General Debold Sinas nga nahuman na ang fact finding investigation nga gibuhat sa Camp Crame kabahin sa kamatayon sa 14 ka gipasanginlang miyembro sa NPA.

Gitugotan na nga makabalik si Tacaca sa iyang pwesto ug posibleng siya na ang mangulo sa seguridad alang sa piniliay didto sa Negros Oriental.

Samtang ang tulo ka hepe sa polis gikan sa duha ka lungsod ug usa ka siyudad sa  Negros Oriental nga naapil sa pagrelibo ang wala pa gipabalik sa ilang pwesto.

Matud ni Sinas nga wala pa niya madawat ang resulta sa imbestigasyon apan masaligon siya nga pabalikon usab ang maong tulo ka hepe nga girelibohan.

Nasayran nga girelibohan si Tacaca ug ang tulo ka hepe sa Manjuyod Police Station, Sta. Catalina ug Canlaon City Police Station aron nga mamahimong patas ang  imbestigasyon nga gihimo batok kanila.

Sa laing bahin, aduna nay bago-ong provincial director ang Bohol Provincial Police Office.

Matud ni Sinas nga si Police Colonel Emma Libunao kinsa gikan sa Camp Crame ug nag-lateral entry sa PNP ang molingkod isip direktor sa Bohol Provincial Police Office.

Dugang ni Sinas nga gikinahanglang  mainstolar na si Libunao alang sa umaabot nga piniliay. (/BDB)(BANAT NEWS)