Kaalyado ni Reluya gihulga sa kaatbang?

CEBU, Philippines – Nipasangil ang kampo ni Mayor Lakambini “Neneth” Reluya ngadto sa iyang kaatbang nga ang estilo sa pagpangampaniya giingong manghudlat o manghulga.

Si Reluya nipasangil nga dili lang iyang mga lider ang gihudlat ang mga kapitan nga naa ang suporta kaniya ang gipanghulga usab sa iyang kaatbang sa politika.

Gani sa ilang tigom nga gihimo nga gitambongan sa Comelec ug kapolisan lakip na ang mga department head nibutyag nga ang mga tawo nga argabiyado nipadayag sa ilang gibati.

Si Mario Oville, Comelec supervisor sa maong lungsod nagkanayon nga ang gihulga sa usa ka kandidato pweding mopasaka og kaso batok sa nanghulga kanila.

Sa iyang bahin, si Police Captain Lymel Pasquin, hepe sa kapolisan sa lungsod sa San Fernando niawhag sa mga gipanghulga nga mopatim-aw diha sa ilang buhatan aron ipa-blotter ang maong hitabo.

Nagkanayon si Reluya nga lakip siya moduso og kaso batok sa iyang kaatbang ug  ubanan niya ang iyang mga lider ug mga sakop nga gipanghulga.

Giingong niabot ngadto sa 100 ka tawo nga dumadapig kang Reluya ang nakasinati og pagpanghulga.

“Kita dili man ta isog, pero ako lang likayan nga mag-abot among dalan kay kami, ako dili gyud ko moatras. Napatay na gud akong bana”, padayag ni Reluya.

Sulod niining semanaha gikatakda sa kampo ni Reluya nga maduso na nila ang kaso batok  sa iyang kaatbang. (/BDB)(BANAT NEWS)