Mayor sa Balilihan, Bohol gikasuhan sa Ombudsman

CEBU, Philippines – Si Balilihan Mayor Maria Pureza Chatto sa Lalawigan sa Bohol ug laing pito ka indibidwal ang nag-atubang og pasangil kabahin sa pagguba sa ilang munisipyo sa Office of the Ombudsman-Visayas

Giingong ang Balilihan Municipal Hall naguba niadtong Oktubre 15, 2013 human miigo ang 7.2 magnitude nga linog. Nasayran nga ang maong munisipyo miabot na sa kapin 50 ka tuig.

Si Jerome Madanguit nga taga Candasig, Balilihan, Bohol nagkanayon nga human miigo ang linog sa maong lalawigan, ang kongreso pinaagi sa supplemental budget niini, migahin og P45 milyones alang sa pagpaayo sa maong munisipyo ubos sa General Appropriations Act.

Apan matud ni Mandaguit nga imbes ayohon ang munisipyo, ang Sangguniang Bayan mipasar og resolusyon pagtugot kang Chatto nga ipaguba ang kasamtangang municipal hall ug magtukod og bag-ong municipal building gamit ang Bohol Earthquake Assistance (BEA) Fund. Ang demolisyon giingong nagsugod naidtong Hunyo 2016.

Matud ni Mandaguit nga ang basihan sa pagpaguba mao ang inspection nga gihimo sa usa ka pribadong tawo, usa ka ginganlan og Engr. Joseph Omamalin.

Nunot niini, gawas ni Mayor Chatto, gipasakaan og pasangil mao silang SB members Abel Eligio Llorente, Christopher Leonides Racho, Wilfreda Navea, Beatriz Parocha, Barbara Llorente, Engr. Omamalin ug ang general manager sa Ascentia Construction Corporation nga si Mario Roy Guibao.

Dugang ni Mandaguit nga nakalapas ang mga gikiha sa National Cultural Heritage Act or Republic Act 10066 kay gi-demolished nila ang building bisan og walay written consent gikan sa komisyon.

Ang pasangil nga gipasaka mao ang anti-graft, grave misconduct, grave abuse of authority, dishonesty, conduct prejudicial to the best interest of the service and conduct unbecoming of a public officer ug kalapasan sa R.A 10066.   Ang maong mga reklamo gipasaka niadtong Marso 28, 2019.

Ang mga gipangkiha patubagon sa maong alegasyon sa Ombudsman-Visayas. (/DILT)(BANAT NEWS)