Asawa gituok sa bana

CEBU, Philippines — Asawa patay human gituohang gituok sa iyang bana apan gipakaaron ingnon sa bana nga naghikog kini sulod sa ilang lawak sa ilang balay sa Barangay Sapangdaku  sa Siyudad sa Sugbu sa miaging Lunes sa gabii.

Ang hepe sa Guadalupe Police Station nga si Police Major Dexter Basirgo miingon sa Banat News nga 11:45 sa gabii niadtong Lunes niresponde sila tungod sa tawag nga dunay babayeng naghikog.

Matud ni Basirgo, sa unang pagtan-aw murag naghikog ang biktima nga si Calixta Perez Roble, 59. Duna kini pisi nga gibulibod sa liog. Apan sa paghiling nila og maayo sa lawas, nakakita sila og foul play.

Ang mga anak sab sa magtiayon mitug-an kanila nga nagduda gyud sila sa ilahang amahan nga  si Leonedis Bantique Robel, 63, tungod kay hagbay nang dili maayo ang relasyon sa ilang mga ginikanan.

“Ang duha dugay na daw ni nga nagbuwag, unya wala na sa maayong buot. Natuok ni niya napatay una niya gihigot sa higdaanan para ingnon nga naghikog,” si Basirgo miingon.

Sumala pang Basirgo, nadunggan ang magtiayon nga grabe ang panag-away pipila ka oras sa wala pa mapalging patay ang ginang. Ang suspek misuway unta sa pag-ikyas apan nadakpan kini sa follow-up operation ug didto gikatahong niangkon kini sa pagpatay sa iyang asawa. Matud ni Basirgo selos ug kwarta ang motibo sa maong pagpatay sa asawa

Pasakaan og kasong parricide si Leonedis kinsa gibalhog karon sa Guadalupe Police Station. (Rowena Capistrano/IBM)(BANATNEWS)