Hugaw sa tawo suliran sa kasapaan

CEBU, Philippines —  Nagplano ang Cebu City Environment and Natural Resource Office (CCENRO) nga mobutang og septic tanks alang sa mga residente nga nagpuyo duol sa Bulacao, Lahug ug Guadalupe river.

Kini human nga ang maong buhatan mitala og gatusan ka mga residente nga walay septic tanks nga maoy nakatampo sa kahugaw sa kasapaan.

Basi sa profiling data, sa 395 ka residente, 259 ang adunay pansayan, 163 ang walay septic tank sa Bulacao river.

Sa Guadalupe river, sa 1,135 ka residente, 908 ang adunay comfort rooms, 389 ang walay septic tanks. Samtang sa Lahug river, sa 624 ka residente, 549 niini ang adunay pansayan, 266 ang walay septic tanks.

Kahinumduman nga ang CCENRO nagpahigayon og profiling aron pagsusi kon pila ka mga residente nga nagpuyo duol sa sapa ang walay septic tanks.

Naumol ang profiling human sa river clean-up sa tulo ka mga sapa diin nakita nila ang hugaw sa tawo nga maoy usa sa nakatampo sa kahugaw sa kasapaan.

Ang pangulo sa CCENRO nga si Nida Cabrera miingon nga gikinahanglan ang pagbutang og septic tanks sa maong mga lugar aron ang hugaw sa tawo dili moderetso sa sapa.

Mihangyo na si Cabrera kang Mayor Tomas Osmeña nga i-charge ang P2 million alang sa procurement sa septic tanks sa Philippine Amusement and Gaming Corporation (PAGCOR) funds. Hinuon, dili pa makahatag si Cabrera kon pila ka septic tank ang ilang himuon sa matag sapa kay magdepende kini sa kadaghan sa mga residente.

Samtang ang CCENRO mopahigayon og education campaign sa mga residente nga nagpuyo duol sa Lahug ug Guadalupe river labot sa proper disposal sa hugaw.  DILT (BANATNEWS)