Rehabilitasyon sa Inayawan landfill tukion

CEBU, Philippines — Magsugod na ang Cebu City Council pagtuki sa planong pagsirado ug rehabilitasyon sa kontrobersiyal nga Inayawan landfill sa Barangay Inayawan karong Abril 16.

Niuyon ang konseho sa sugyot ni Konsehal Jocelyn Pesquera nga mopahigayon og executive session sa dili pa mopagawas og desisyon kun aprubahan ba o dili ang rehabilitation plan.

Niadtong Marso 26, si Konsehal Jerry Guardo ni-sponsor og resolusyon nga nagtinguha sa approval sa closure ug rehabilitation plan nga gisumitir sa Full Advantage Phils. International Inc.(FAPII).

Ang mga imbitadong speakers alang sa executive session mao ang Cebu City Environment and Natural Resources Office ug FAPII.

Ni-request sab si Pesquera kang Guardo nga mohatah og kopya sa plano alang sa tanang konsehal aron matun-an daan sa dili pa ang sesyon.

Kahinumdoman nga gi-endorsar sa City Council alang sa deliberasyon ug approval ang ang giduso nga 53 ka pahinang Solid Waste Management Board(SWMB).

Ang SMWB gilangkuban sa mga representante gikan sa Department of Public Services, City Council Committee on Environment, Department of Science and Technology, Environmental Management Bureau, public sectors ug uban pa.

Niadtong buwan sa Enero, mga eksperto gikan sa FAPII mi-presentar sa ilang assessment report ingon man rekomendasyon alang sa closure plan sa landfill sa CCENRO.

Planong butangan og industrial economic zone, recreational eco-park, renewable energy center ug waste-to-energy facility sa service area ang maong lugar.

Samtang ang rehabilitasyon maglakip sa concrete fencing, restoration ug improvement sa access road, plano sa top soil cover, management sa gas vents, drainage system, stabilization sa critical slope, final soil cover, leachate management, gas vent system, prevention sa illegal dumping, vegatation ug greening, social action plan alang sa apektadong waste pickers ang gi-proposed.

Ang rehabilitasyon gipanglantawang makagasto og P135 million. Kinahanglan kini agi og pagtuman sa mando sa Court of Appeals sa siyudad human kini gipasirad-an niadtong Disyembre 15, 2016. (/IBM)(BANATNEWS)