14 NPA patay sa Sempo

CEBU, Philippines —  Nahimong dugoon ang gihimong Synchronized Enhanced Managing Police Operations (SEMPO) nga gilusad sa Police Regional Office-7 sa nagkadaiyang dapit sa rehiyon  sugod niadtong adlaw nga Huwebes hangtud kagabii.

Miabot 14 ka mga gikatahapang sakop sa Communist Party of the Philippines- New People's Army (CPP-NPA) ug duha ka high value target sa ilegal nga drugas ang ilang napatay human giingong nanukol.

Ang SEMPO gibahin sa duha ka parte: kontra ilegal nga drugas ug ang Oplan Sauron (part two) didto sa Negros Oriental nga ang target mao ang mga gikatahapang mga NPAs.

Tumong sa Oplan Sauron ang pagdakop sa suspetsadong miyembro sa CPP-NPA ug ang Special Partisan Unit (SPARU) pinasikad sa search warrants tungod sa paghupot og mga armas.

Si Police Regional Office-7 director General Debold Sinas miingon nga ang mga nakalas dili padakop nga buhi kay nakigpinusilay gyud sila sa mga polis didto sa Canlaon City ning higayona.

Niadtong Disyembre 27 hangtud Disyembre 29 sa miaging tuig gilusad ang Oplan Sauron didto sa Guihulngan City, Negros Oriental diin unom ka mga membro sa SPARU ang nakalas ug 24 ka membro sa NPA ang  nangadakpan pinasikad gihapon sa search warrant.

14 Patay

Ang Oplan Sauron part two nagpadayon pa atol ning pagsuwat sa balita kagabii, 12 na ang nadakpan ug 14 ang napatay sa mga target sa warrants human sila nisukol.

Ang mga napatay sa Canlaon giila sa kapolisan nga silang Edgardo Avelino; Esmael Avelino; Rogelio Recomono; Genes Palmares; Gonzalo Rosales; Ricky Recomono; Melchor Pañares; ug si Mario Pañares.

Napatay sab sa operasyon sa  lungsod sa Manjuyod silang: Steve Arapoc; Manulo Martin; Sonny Palagtiw; ug si Eric Acabal.

Samtang ang mga napatay sa Sta.Catalina mao si Ano Enojo Rapada ug si Franklin Lariosa.

Usa sab ka polis ang kritikal ang kahimtang nga giilang si Police Corporal Ian Puerto, augmentation gikan sa Regional Mobile Force Battalion-7 sa Canlaon Police Station human ang ilang dakpunon nakauna pagpusil kanila.

Nakuha sa kapolisan atol sa operasyon ang 17 ka kalibre .38; pito ka kalibre .45; tulo ka shotguns; walo ka rifle grenades; duha ka granada; ug tagsa ka homemade rifles, kalibre .357, ug kalibre .22 ug ingon man nagkalain-laing mga bala.

Espiya sa NPA?

Samtang usa sa ilang mga nadakpan gidudahang espiya sa NPA tungod sa nakuhang mga subersibong dokumento sama sa mapa, sketch, ug listahan sa mga pangalan sa mga polis sa Canlaon Police Station.

"Naay nakuha usa sa mga dinakpan namo gituohan ni nga organizer ug spotter kasi duol ang iyang balay sa police station and naay mapa, sketches and naay mga listahan sa mga pangalan sa mga polis, so gi-monitor gyud nila ang police station," si Sinas nagkanayon.

Gituohang usa siya sa mga suspek sa pagpangrakrak sa Canlaon Police Station niadtong nakalabay’ng semana.

Sigun pang Sinas tungod sa maong SEMPO wala makalusad og pagpangatake sa mga police stations sa Negros Oriental atol sa ika-50 nga anibersaryo sa NPA niadtong Biyernes.

"Nabulaga na pud sila kay kabalo mo, di ba palagi na lang polis ang atakihon? Eh karon, aw giunahan na namo sila para di sila maka consolidate duol sa mga estasyonan," dugang ni Sinas.

Nisukol

Samtang sa Sitio Sip-ak, Barangay Sudlon 1 sa Dakbayan sa Sugbo, patay ang 35 anyos nga si Edcel Baculi, nga usa ka high value target ug naapil sa listahan sa Barangay Anti-Drug Abuse Council (BADAC) sa maong barangay.

Ang kapolisan nagbitbit sa search warrant nga giluwatan ni Judge Soliver Peras, Presiding Judge  sa Regional Trial Court  7 , Branch 10, Cebu City batok kang Baculi apan napatay kini human giingong nisukol.

Usa ka paltik nga rifle with silencer and scope, usa ka 1911 caliber .45 pistol, ug duha ka mga basiyo sa bala ug lain pang mga bala ug lima ka mga gagmay’ng pakete sa gidudahang shabu  ang nasakmit.

Talisay City

Samtang sa Dakbayan sa Talisay, napatay sab si Eric Ruiz alyas Budlong, 28, nga high value target sa kapolisan diha sa Sitio Santa Cruz, Barangay Mohon kagahapon sa kaadlawon.

Si Police Major Ardeolito Cabagnot, deputy chief sa Talisay City Police Station nagkanayon nga gihatdan nila og search warrant nga giluwatan ni Judge Jacinto Fajardo Jr. sa Regional Trial Court (RTC) sa branch 66 si Ruiz.

Apan gipusil niini ang mga polis maong gibawsan ug maoy napatay. Usa ka revolver nga dunay mga basiyo ug bala ingon man usa ka dakong pakete sa gidudahang shabu ang nasakmit sa crime scene.  IBM (BANATNEWS)