Cellphones nakuha sa CPDRC gipangguba

CEBU, Philippines – Sobra 200 ka mga cellphones ang gipangguba ug usa ka sako nga tabako ang gipangsunog sa mga kadagkuan sa Cebu Provincial Detention and Rehabilitation Center (CPDRC) kagahapon.

Ang maong mga kontrabando resulta sa nagkadaiyang greyhound operation nga gihimo sa nagdumala sa maong prisohan sukad niadtong bulan sa Enero hangtud niadtong Huwebes.

Matud ni Atty. William Boco ang consultant on jail management sa CPDRC, nga 55 na gikan sa 119 ka selda ang ilang nahimuan og operasyon.

Apil na niani ang mga selda sa mga high profile inmates nga naglakip sa selda ni Alvaro “Barok” Alvaro.

Hinuon walay nakuha kang Barok sanglit nag-inusara na kini sa usa ka selda human siya nasakpan nga mibalhin og laing selda usa ka bulan na ang milabay

Matud ni Boco nga mga karaan na lang nga cellphones nakuha ug gani wala nay ilegal nga drugas ug bisan drug paraphernalias.

Dugang niini nga mohimo sila og greyhound ka duha ngadto sa tulo ka higayon sa usa ka semana.

Sa pagkakaron moabot ngadto sa 3, 096 ang mga priso sa CPDRC gikan sa dul-an 4 mil sa miaging tuig.

Asoy sa consultant sa provincial jail nga sukad Enero, anaa na sa 500 ka mga priso ang napagawas tungod sa plea bargaining agreement, kapaspas sa pag-irog sa kaso ug sa good conduct time allowance program sa CPDRC diin ang kadugayon sa tuig nga pagkapriso sa usa ka inmate makuhaan kon kini magbinut-an sa sulod. (/DILT)(BANAT NEWS)