Silawan murder suspect balik CSWD

CEBU, Philippines – Tungod sa gituohang pag-interbiner ni Pres. Rodrigo Duterte nabalik sa kustodiya sa City Social Welfare and Development sa Lapu-Lapu City ang 17-anyos nga suspek sa pagpatay kang Christine Lee Silawan human kini gipabuhian sa piskalya sa miaging semana tungod sa mosyon sa abogado nga nag-ingong ilegal ang pagdakop kaniya.

Dungan sa paglubong kang Silawan niadtong Marso 23, gipabuhian sa prosekyutor ang maong batan-on kay illegal ang pagkadakop kaniya sa NBI-7 kay lima ka adlaw na gikan sa pagka-kaplag sa lawas ayha pa gidakop ang maong batan-on.

Human nakagawas giingong gidala kini sa usa ka safe house kay sensitibong kaso ang gikalambigitan niini.

Apan karon, subay sa mando sa presidente giingong mismong ang prosekyutor na ang nakighinabi sa pamilya sa suspek aron hangyoong ipabalik sa CSWD ang maong menor de edad.

Si Leticia Patalinghug, Home Care Center head nagkanayon nga “voluntary commitment” ang nahitabong pagbalik sa suspetsado kagahapong adlawa.

Niadtong adlaw nga Miyerkules, niduso og motion for reconsideration ang NBI-7 bahin sa pagkustodiya og balik sa suspek ug kini gitugotan ni Lapu-Lapu City Prosecutor Ruso Zaragoza.

“In a way disappointed kay dili siya ka-enjoy sa iyang pagkabata. Though it is a homecare facility but limited iyang movements unlike other children.  But sometimes you have to understand na if mailhan siya basin he will be subjected to hate crimes,” matud ni Atty. Vincent Isles, abogado sa menor de edad nagkanayon.

Wala hinuoy aligutgot ang kampo sa batan-on ngadto sa presidente apan nagduda si Isles nga wala mabasa tanan ni Duterte ang kaso.

“I think the president is misinformed, he was not able to read the whole case siguro summary lang ang naabot sa iyaha kay if makabasa ka sa tanan, makahibaw gyud ka especially si President nga abogado,” sigun ni Isles.

Ang amahan ni Silawan nga si Mario Pardillo kinsa niduaw sa NBI-7 kagahapon nagpasalamat sa pag-interbiner sa presidente.

Matud niya wala pa gihapon sila kadawat sa gidangatan sa ilang anak. Dako ang iyang pagtuo nga adunay kauban ang maong dinakpan.

Sama sa nangaging mga adlaw, limitado na ang pamahayag sa NBI-7 ug sa kapolisan bahin sa maong kaso subay sa mando sa piskalya.

Nasayran nga gidakop sa NBI-7 ang 17- anyos nga gituohang ex-boyfriend ni  Silawan human kini natumbok pinaagi sa nakuhang footages sa CCTV nga siya maoy katapusang nakauban sa biktima nga naglakaw gikan sa Sacred Heart of Jesus Parish hangtud sa lugar duol sa bakanteng luna sa Sitio Bankal, Barangay Pajac, Lapu-Lapu City niadtong Marso 10 sa gabii, adlaw’ng Domingo.

Marso 11, napalgan na lang nga patay ug gipanitan ang nawong sa biktima sa maong lugar. (Rowena Capistrano/IBM)(BANAT NEWS)