'Greening program' sa BRT ipadayon

CEBU, Philippines – Ipadayon sa Cebu City Government ang implementasyon sa greening program alang sa Bus Rapid Transit nga makaapektar sa earth balling sa moabot sa 2,182 ka kahoy sa rota niini.

Karong tuiga, ang pangulo sa Cebu City Environment and Natural Resources Office (CCENRO) Nida Cabrera miingon ang siyudad motanum og 350,000 ka kahoy isip hulip sa mga kahoy nga i-earth balled sa rota ug ibalhin sa mga hawan nga dapit sa syudad sama sa duol sa mga kasapaan.

“With the advice nga implement napod ang BRT, nag-start na ta og process sa atong compliance for its greening project. We have 10 nurseries sa project ug mag start na ta og massive tree planting next month”, matud ni Cabrera.

Adunay 12,000 ka kahoy ang itanom sa pipila ka Barangay sa siyudad.

Miingon si Cabrera nga ang ilang buhatan nag-andam alang sa usa ka massive tree planting karong Abril 6 didto sa Barangay Buhisan, Abril 13 sa Barangay Tabunan ug Abril 27 sa tunga-tunga sa Barangay Buhisan ug Quiot.

Ang maong mga barangay naila nga forest land sa Cebu City. Ang mga kahoy nga itanom naglangkob sa cacao, guyabano, coffee, lemoncito, forest, indigenous trees ug uban pa.

Nunot niini, kini miasoy ang ilang buhatan nagkinahanglan og dili momenus 500 ka volunteers alang sa massive tree planting diin ang matag usa mananom og 20 ka saplings.

Ang siyudad nigahin og nurseries sa napulo ka barangay sa siyudad sama sa Sirao, Taptap, Sudlon II, Guba, Busay, Tagba-o, Tabunan, Buhisan, Toong ug Adlaon.

Kahinumduman ang BRT project moresulta sa “harvesting or cutting” sa 197 ka kahoy sa 2,182 ka identified trees nga apektado sa proyekto.

Ang maong 197 ka kahoy mao kini ang gamay og tsansa sa survival nga i-earth balled.

Kagahapon, si Cabrera miingon nga dunay 172 ka kahoy diha sa Natalio Bacalso Avenue nga na-earth balled ug nabalhin sa laing lugar sanglit duna may on-going underpass project sa dapit.—/LPM(BANAT NEWS)