Suspek sa pagpatay ni Silawan pabuhian

CEBU, Philippines – Ang Kampo sa 17-anyos nga dinakpang suspek sa pagpatay ni Christine Lee Silawan misumiter og mosyon ngadto sa piskal nga buhian kini sanglit giingong walay ‘personal knowledge’ ang mga ahente sa National Bureau of Investigation-7 (NBI) sa  krimen.

Sa mosyon sa kampo sa dinakpan, gipasabot nga walay katungod ang NBI nga dakpon ang maong batan-on sanglit  wala sila makakita mismo sa krimen, diha na sila mitumbok sa batan-on dihang nadeskobrehang siya maoy katapusang kuyog ni Silawan.

Wala usab silay eye witness account nga gipatay gyud sa   17- anyos ang 16-anyos nga si Silawan.

Ilang gipamugus nga walay katungod ang NBI nga dakpon ang 17-anyos nga walay warrant of arrest, lima ka adlaw human ang krimen, sanglit nasigpatan lang kini sa CCTV nga maoy katapusang nakauban ni Silawan, diin giingong dili man matawag nga krimen.

Apan una nang giklaro sa kasong gisang-at sa NBI, nga wala makita sa CCTV nga milahos ang duha unahan sa bakanteng luna diin napalgan si Silawan, hinungdan nga nakaingon sila nga nanglahos ang duha ngadto sa lugar nahitaboan sa krimen.

Hinuon, kasamtangan pang gipaabot ang desisyon sa piskal.

Sa laing bahin, padayag sa direktor sa Police Regional Office-7 nga si Chief Superintendent Debold Sinas nga susama ra ang dagan sa ilang imbestigasyon ug sa NBI, ug giingong pareha ang ilang natumbok nga suspetsado.

Butyag niini nga base sa certificate of discernment sa dinakpan gikan sa Department of Social Welfare and Development, giingong nasayod ang maong dinakpan sa krimen ug giingong above average ang mental ability niini.

“Puwede gyud siya file-an ug kaso. So kung murder ang gi-file sa NBI dili siya pwede maka invoke nga minor pa siya kay ang assessment sa DSWD nga he will be charged as an adult already,” si Sinas miingon sa mga reporter kagahapon.

Padayag sa direktor nga misuporta sila sa gihimong imbestigasyon sa NBI, gani giingong gibalikan sa mga polis nga imbestigador ang lugar nahitaboan sa krimen sanglit dako ang ilang pagtoo nga aduna pay nabilin nga mga ebidensya sa dapit.

Nasayran nga gidakop sa NBI-7 ang suspek nga batan-on kinsa gituohan nga ex-boyfriend ni Silawan human kini natumbok pinaagi sa nakalap nga CCTV nga siya maoy katapusang nakauban sa biktima nga naglakaw gikan sa Sacred Heart of Jesus Parish, paingon sa bakanteng luna sa sitio Bankal, Barangay Pajac, Lapu-Lapu City niadtong Marso 10 sa gabii.

Sa Marso 11, napalgan na lang nga patay ug gipanitan ang nawong sa biktima. —/LPM (BANAT NEWS)