Dunay bulok politika ang pagdakup kang Encabo?

CEBU, Philippines – Bisan og dili magpapili sa umaabot nga piniliay, daku ang pagtuo sa suspek nga si Shielbert Michael Alerta Encabo nga politically motivated ang pagpapriso kaniya.

Si Encabo gidakop human gitumbok nga maoy nagpaluyo sa pagpakatap og gikatahong drug list sa Lungsod sa San Fernando.

Giangkon niini nga supporter siya ni Ruben Feliciano samtang ang reklamante supporter ni San Fernando Mayor Lakambini Reluya.

Gihimakak niya naghimo-himo siya og mga dummy account sa social media aron lang maka-post og drug list sa San Fernando. Iyang depensa nga dili siya polis nga may gahum nga manguha og impormasyon kabahin sa mga nalambigit sa ilegal nga drugas.

“Akoa gyung gipangusgan, wala gyud koy drug list, wala ko nakuptang drug list. Kana man gud naa sa drug list sa San Fernando, ug dili sila guilty, panggawas ngano man nga ako man ang pasanginlan,” sigon ni Encabo.

Samtang ang hepe sa San Fernando Police Station nga si PCIns. Lymel Pasquin miingon nga human madakpi si Encabo, walay nahitabong komosyon tali sa gituohang mga kauban niini.

“May reports kami na baka just in case, manggulo yung supporters niya o kagrupo. Wala naman pong nangyari,” sigon ni Pasquin.

Kahinumduman nga niadtong Marso 4, 2019, nagpundok ang mga opisyal sa naasoy nga lungsod sanglit naalarma sila sa seguridad sa ilang lugar nunot sa maong mikatap nga listahan sa mga nalambigit sa ilegal nga drugas.

Una nang gihulagway sa Police Regional Office-7 nga gisakyan ra sa politika ang maong listahan.

Si Pasquin mibutyag nga bisan og nadakpan na ang gituohang utok sa pagpakatap sa peke nga drug list, dili pa gihapon kini mamahimong basihan nga ipaubos ang kategorya sa lungsod sa Election Watchlist           Areas.

Nasayran nga   anaa sa red category ang San Fernando nunot sa grabeng political rivalry ug sa nahitabong pagpamanhig sa ilang mayor niadtong buwan sa Enero niining tuiga diin namatay ang bana niini ug ang duha ka mga staff. (/DILT)(BANAT NEWS)