Kaso batok Margot gibasura

CEBU, Philippines – Gibasura sa Office of the Ombudsman ang kriminal ug administratiba nga kaso nga gisang-at sa 40 kanhi ug incumbent nga mga piniling opisyales sa gobyerno batok kang Cebu City Councilor Margarita Osmeña.

Sa desisyon niadtong Hulyo 20, 2018, ang Ombudsman nag-ingon nga ang mga reklamante kuwang og posibleng hinungdan ug lig-on nga ebidensiya sa pag-indict kang Osmeña sa maong mga kaso.

Ang mga kaso nga gisang-at batok sa konsehala naglangkub sa kalapasan sa Section 35 sa R. A No. 6770 o Malicious Prosecution under the Ombudsman Act of 1989, administrative offenses of Conduct Prejudicial to the Best Interest of Service, Grave Misconduct, Oppression and Violation sa R.A. No. 6713 or Code of Conduct and Ethical Standards for Public Officials and Employees ug violation sa R.A. No. 9485 o Anti-Red Tap Act of 2007 and violation of E.O. No. 292 the Administrative Code of 1987 nga gisang-at niadtong Nobyimbre 9, 2017.

“WHEREFORE, for the lack of probable cause and substantial evidence, respectively, the complaint for…against MARGARITA V.OSMEÑA is DISMISSED,” tipik sa desisyon sa Ombudsman.

Gipasakaan og kaso si Osmeña tungod sa pagkiha sa konsehal kanila human sila pakyas sa pag-uli sa mga sakyanan nga gipanag-iya sa siydudad.

Kahinumduman nga si Osmeña kinsa mao ang acting mayor niadtong panahona miisyu og memorandum sa pag-uli sa mga sakyanan aron maimbentaryo kini niadtong Mayo 17, 2016.

“It would have been malicious, had respondent concocted false facts in support for her case, but respondent did not stoop to that level,” tipik sa desisyon. Dugang sa desisyon nga ang mga reklamante pakyas sa pag-establisar sa mga elemento sa kaso nga gipasangil batok kang Osmeña.

Ang mga nireklamo mao sila si Ana Tabal, Rosalita Callino, Manny Pepito, Joel Sable Sr., Nerissa Antolihao, Maria Velasquez, Norman Navarro, Ma. Yvonne Feliciano, Joel Garganera, Zenaida Colina, Ramil Ayuman, Reynald Lauron, Jerson Cadampog, Phillip Zafra ug Jovito Taborada Jr. Lakip usab sila si Ronald Labitad, Altea Lim, Yolandito Cagang, Lutherlee   Madugay, si Raquel Avia, Orlan Herrera, Fritz Gerald Herrera, Lorna Damalerio, Rogelio Resurreccion, Lemar Alcover, Stephen Carl Belarmino, ug Manuel Gimeno.

Ingon man sila si Alejandro Borres, Felicisimo Rupinta, Winefredo Macario, Rodulfo Tabasa, Dante Tabucal, Jerome Lim, Noli Ann Alcover, Eliodoro Sanchez, Eduardo Lauron, Trofonio Lequigan Jr., Antonio Caruzca, Ramon Ylaya ug Alan     Masecampo.

Kagahapon, si Francis Ocampo, ang City Legal Attorney miingon nga ila nang gidahuman nga pabor kang Osmeña ang desisyon kay ang mga reklamante wala'y igong basihan.

"There was definitely no malice in the filing of the cases. It was her duty as Acting Mayor to see to it that the lawful orders/directives are complied with," suma pa niya. (/DILT)(BANAT NEWS)