‘Outbreak’ sa tipdas posibleng libkason

CEBU, Philippines – Posibleng libkason na ang ‘outbreak’ sa tipdas human migawas ang indikasyon nga mikunhod ang kaso niini ikompara sa mga miaging buwan.

Si Dr. Jonathan Neil Erasmo, Chief Local Support Office sa DOH-7, miingon nga padayon gihapon ang ilang pagpamakuna sa mga kabataan may kalabutan sa tipdas diin niabot na ngadto sa 49.45 percent ang ilang accomplishment ug gipaabot nga kini mosaka pa sa umaabot nga adlaw.

Gibutyag ni Erasmo, dili pa siya makasulti kung kanus-a ilibkas ang outbreak kay national man kini apan malaumon siya sa umaabot nga adlaw mawagtang ra kini tungod kay adunay indikasyon nga niubos ang porsyento sa kaso kung ikomparar sa nilabay nga adlaw, apan bisan pa man niini angay dili gihapon mokompyansa ang mga ginikanan ug magpabakuna gihapon sa ilang mga anak.

Sa katapusan nga datos sa DOH-7 adunay 1, 058 ka kaso ug napulo na ang patay gikan sa dakbayan sa Sugbo.

Nag-una gihapon ang dakbayan sa Sugbo nga adunay 322 ka kaso, gisundan sa Lapu-Lapu City 61, Talisay City 45, Mandaue City 44 ug Consolacion 20. —/LPM (BANAT NEWS)