Crame: Bueno dili prime suspect sa Silawan murder

CEBU, Philippines — Gitin-aw sa kadagkoan sa polis sa kampo Crame nga prime suspect sa pagpatay sa 60 anyos nga mag-uuma sa Danao ug dili sa 16 anyos nga si Silawan si Jonas Bueno.

Sa Facebook live  page sa Philippine National Police, gitin-aw sa tigpamaba sa kampo Crame nga si Police Senior Superintendent Bernard Banac nga wala miluwat ang Special Investigation Task Group sa hulagway ni Jonas Bueno nga maoy primary suspek sa pagpatay sa dalagita nga si Christine Lee Silawan.

Sukwahi kini sa mga naunang nanggawas nga taho. Giingong si Bueno gidakop sa warrant of arrest niini sa kasong pagpatay ug pagpanit sab sa nawong  sa 60 anyos nga si Trinidad Roble Batucan, mag-uuma didto sa Agutayan, Barangay Lawaan, Dakbayan sa Danao kinsa napalgan niadto pang Enero 13, 2019.

Si Jonas ug ang iyang mga igsuon nga silang Junry ug Jovie maoy gitumbok nga suspek sa maong krimen. Napatay silang Jovie ug Junry human giingong nakigpinusilay sa kapolisan atol sa hot pursuit operation. Samtang nakasibat sa maong operasyon si Jonas.

Niadtong Biyernes sa gabii, nadakpan sa kapolisan ug sa National Bureau of Investigation si Bueno didto sa Davao City pinasikad sa warrant of arrest.

Matud pa sa direktor sa Police Regional Office-7 nga si Chief Superintendent Debold Sinas,  dili pa matumbok nga suspek si Bueno sa kaso ni Silawan sanglit wala pay ebidensya nga makatakdo niya sa maong kaso gawas lang sa pagkaparehas sa paagi sa pagpatay sa tiguwang ug kang Silawan.

Butyag sab ni Banac ngadto sa mga reporter sa kaulohan nga nadiskobrehang usa ka adlaw sa wala pa patya ang dalagita, aduna kini naka-text gamit ang cellphone sa iyang paryente.

Apan wala itug-an sa duha ka mga opisyal ang detalye sa maong mensahe ingun man ang pangalan sa maong ka-text sa biktima.

Wala sab gibutyag kun unsa nga motibo sa krimen ang ilang gisubay sanglit matud pa nga kun ibutyag kini, matumbok na dayon sa publiko ang suspek ug nabalaka silang makaikyas kini.

Niadtong Marso 11, adlaw’ng Lunes,  napalgan ang patay’ng lawas ni Silawan nga gipanitan na ang nawong niini ug nabulit og 30 ka samad dinunggaban ug tinigbasan.

Samtang si Archbishop Jose Palma sa Archdiocese of Cebu nipadayag sa iyang kasubo sa gidangatan ni Silawan ug iyang giampo nga makonsensya ang mga mamumuno ug makabaton og hustisya ang pamilya sa dalagita. (Rowena Capistrano/IBM)(BANATNEWS)