Hearing sa gisirad-an nga pawnshops

CEBU, Philippines – Gimanduan sa Regional Trial Court ang kagamhanan sa Siyudad sa Sugbo ug ang management sa Jerome’s Pawnshop nga mosumiter og position paper kalabot sa gipasaka nga kaso sa pagpasira sa siyam ka branches niini nga nahimutang sa dakbayan niadtong Marso 8.

Kagahapon sa buntag, nagkita ang mga representate sa siyudad ug sa Jerome’s Pawnshop sa hearing sa gipasakang kaso ni Diogenes Avila, tag-iya sa pawnshop, batok sa siyudad.

Walay presentasyon sa mga ebidensiya ug saksi kagahapon apan gipangayoan ang duha ka habig og position paper kalabot sa petition ni Avila nga mo-issue og injunction with temporary restraining order and/or writ of preliminary injunction to prohibit the city government from proceeding with the closure.

Gipasakaan og kaso ni Avila si Mayor Tomas Osmeña ug Office of the Prevention, Restoration, Order and Beautification Enhancement aron dili madayon ang pagsirado sa mga branches sa maong pawnshop. Giasoy ni Avila nga nagsige siya og bayad og buhis niadtong tuig 2002 mao nga walay katungod ang siyudad nga pasirad-an ang iyang negosyo kay bugtong ang Bangko Sentral ng Pilipinas lang ang adunay katungod niini.

Apan matud sa siyudad nga makapasirado sila og pawnshops kay kulang kini og rekitos gikan sa BSP. (/DILT)(BANAT NEWS)