Pamolitika sa pagpanghatag og incentives gihimakak

CEBU, Philippines – Gihimakak ni Bise Gobernador Agnes Magpale nga gipamolitika sa Kapitolyo ang pagpanghatag og cash incentives ug honorarium sa mga kawani sa barangay sa Lungsod sa Liloan, kini human nga pipila sa mga barangay workers ang wala mahatagi niadtong Marso 8.

Matud ni Magpale nga sa pag-adto nila ni Gobernador Hilario Davide III sa Liloan, pipila lang ka barangay health workers, tanod ug uban pang kawani sa barangay ang miadto sa gym ug midawat sa ilang honorarium.  Sumala sa bise gobernador nga giingnan pa nila ang ubang kawani nga paapason sa Consolacion aron mahatag ang ilang honorarium. Ang uban miadto, samtang ang uban wala na moapas.

Niadtong Marso 8, ang Kapitolyo nanghatag kini og honorarium sa mga barangay workers sa Compostela, Liloan ug Consolacion. Dugang sa bise gobernador nga adunay misulti kanila nga adunay taga Kapitolyo nga miadto sa Liloan nga nagpahibawo nga gisibog ang pagpaghatag og allowance. Gisuta na nila kini kon kinsa ang maong empleyado, apan mipahimangno si Magpale ngadto sa mga barangay workers nga motuo lang sa sulat gikan sa Kapitolyo.

Gitataw niya nga wala sila magkulang kay ila mang gipadad-an og sulat si Liloan Mayor Christina Frasco kalabot sa maong kalihukan. Giklaro ni Magpale nga kadtong wala mahatagi, malangay una nilang madawat ang incentives kay kinahanglan pang humanon ang ubang lugar una pa ma-proseso ang payroll alang nila. (/DILT)(BANAT NEWS)