Pagsaba-saba gidili sa San Remigio

CEBU, Philippines — Higpit karon nga gidili sa kagamhanan sa Lungsod sa San Remigio ngadto sa mga  drayber sa nagkadaiyang sakyanan lakip na niini ang mga motorsiklo ang pagpakusog sa pagpadagan ug pagbosina isip paagi sa pag-regulate sa noise pollution ug ingon man gikusgon sa ilang pagpadagan sa pinili nga mga lugar.

Kini gipatuman human sa pag-aprobar sa konseho sa maong lungsod sa ordinansa nga naglatid na og maximum allowable noise level sa mga lugar nga nahimutang ang tulunghaan, hospital, simbahan, mga residential areas, commercial areas ug industrial areas.

Hinuon adunay pamaagi isip  “special remedies” sa mga nagkadaiyang establisamento o mga  residential area nga adunay selebrasyon nga pagahimuon nga naglakip sa  live band, videoke, fireworks display ug uban pang mga kalingawan nga makamugna og kasaba sa matag lugar.

Gikinahanglan nga mokuha og  permit  gikan sa kagamhanan sa maong lungsod ang mga magpasiugda og kalingawan aron kahatagan og tukmang  pamaagi nga ang gigamit nga kahimanan dili  mosubra gikan sa  allowable sound level limits.

Apan wala malakip sa maong ordinansa nga gipatuman sa kagamhanan sa maong lungsod ang mga giisip nga special nga okasyon, panagtapok sa katawhan ug ingon man ang election-related gatherings.

Sa maong ordinansa nga gipatuman gilatid ang pagbayad og multa sa makahimo og kalapasan nga dili moubos sa P1,500 ngadto sa  P2,500. (BANAT NEWS)