Public Library pauswagon pa ang serbisyo

CEBU, Philippines — Human nga gibuksan sa publiko ang Cebu City Public Library 24-oras mamahimo na usab nga automated ang serbisyo niini isip pangandam sa ika-100 nga anibersaryo nga katukoran sa maong library karong umaabot nga Abril 13.

Matud sa librarian nga si Rosario Chua nga gipangandaman nila ang maong selebrasyon og gani madugangan pa ang facilities sa library.

Ang mga Sugboanon nga dili makahigayon sa pagbisita sa library mamahimo na unyang mogamit  sa internet tungod kay duna na unya’y website ang library ug makita na unya didto ang mga libro nga anaa sa library.

Daghan ang nahatagan og serbisyo sa library ug matud ni Chua nga kinahanglan usab nila nga panindoton pa ang ilang serbisyo.

Niabot na sa 132,500 ka tawo ang ilang naalagaran sugod niadtong Marso 9, 2018.

Lakip sa pagpauswag sa serbisyo pinaagi sa pagpalit og bag-ong mga libro nga mokabat og P1 milyon ug P300 mil nga libro alang sa mga bata ug  adunay P3.5 milyones nga pundo nga gigahin aron sa automation sa operasyon sa library.

Gawas niini, hapit na usab mahuman ang renovation sa  audio visual room sa library nga gihimo nga usa ka multipurpose room. Ang maong lawak gamiton sa library alang sa mga conference ug tunghaan sa gustong makat-on og langyaw’ng pinulongan.

Gihatagan og certificate sa pasalamat sa library ug ni Konsehal Margarita Osmeña ang mga tawo nga nakatabang sa kalamposan sa 24-oras nga operasyon sa library sulod na sa usa ka tuig.

Si Dr. Stephen Montero ug ang mga tinun-an sa Southwestern University-Phinma (SWU-PHINMA) gipasalamatan tungod sa ilang tabang sa rebranding sa library.

Si Francis Sollano, rebranding consultant nagkanayon nga ilang nakita nga kinahanglan ang library applicable sa mga batan-on o millennials.

Gibutyag ni Sollano nga humana sila sa  paghimo sa mga visual sa library ug gani ang ilang gitrabaho karon mao nga mahatagan og maayo nga kasinatian ang mga kliyente sa library. (/BDB)(BANATNEWS)