Balik sa karaang titulo

CEBU, Philippines — Rank classification sa kapolisan, kasamtangang ibalik una sa naandan samtang gihimo pa ni PNP Chief Oscar Albayalde ang Implementing Rules and Regulation o IRR niini nga gisunod sa ranggo sa army.

Apan giklaro sa direktor sa Police Regional Office-7 nga si Police Brigadier General Debold Sinas nga basi sa nadawat niya nga internal memorandum gikan sa Campo Crame, ang ilang mga internal nga dokumento lang ang maapektohan niini.

Sa media ug publiko giingong mahimo ra nga tawgon sila sa maong nomenclature. Kini human wala pa matino sa kadagkuan sa PNP kon unsay angayang gamitong abbreviations sa ilang mga ranggo nga dili mahisama sa army.

"Kadto rang mga official documents namo, internal documents mao tong mag-observe pa, pero the rest pwede ra," sigon ni Sinas

Matud niini nga kon ma-publish na sa Official Gazette sa Pilipinas ang maong IRR, hayan gamiton na nila ang maong bag-ong mga ranggo.

"Ang gusto lang sa Campo Crame until officially na-publish plus naa nay IRR, ang Camp Crame to consider kinsa ang entitled and kung unsa ang mga abbreviations, and kon kanus-a gamiton," dugang ni Sinas.

Nasayran nga gipirmahan ni Presidente Rodrigo Duterte niadtong Pebrero 8, 2019 ang Republic Act 11200 kon pag-ilis sa titulo sa mga polis diin magsugod kini sa Patrolman/Patrolwoman; Police Corporal; Staff Sergeant;  Master Sergeant; Senior Master Sergeant; Chief Master; Executive Master; Lieutenant; Captain; Major; Lieutenant Colonel; Colonel; Brigadier General; Major General; Lieutenant General; ug ang labing taas mao ang General.

Gi-amendahan niini ang Section 28 sa RA 6975 niadtong 1990 diin nag-ingong ang ranggo sa mga polis lahi sa army: magsugod kini sa Police Officer 1, PO2, PO3, Senior Police Officer 1, SPO2, SPO3, SPO4; Police Senior Inspector, Police Chief Insp., Police Superintendent, Police Senior Supt., Police Chief Supt., Police Director, Police Deputy Director General, ug ang kinatas-an mao ang Police Director General. (/DILT)(BANATNEWS)