Mga rota sa PUJ usbon

CEBU, Philippines — Sulod sa usa ka tuig gilaumang adunay mga bag-ong rota ang mga biyahe sa mga public utility jeep sa Dakbayan sa Subgo kini ubos sa kamanduan ni Mayor Tomas Osmeña.

Niadtong Marso 4, niluwat og Executive Order si Osmeñ alang sa katukoran sa Local Public Transport Route Plan (LPTRP) team.

Kini subay sa memorandum sa Department of Interior and Local Government ug sa Department of Transportation.

Ang maong team gilangkuban sa mayor nga maoy tsirman ug sa tsirman sa transportasyon sa konseho sa dakbayan isip co-chairman, city administrator isip co-chairman ug ang mga miyembro niini gilangkuban sa City Planning and Development Coordinator, Motorized Tricycle Regulatory Board head ug ang mga pangulo sa Cebu City Transportation Office, Department of Engineering, City Agriculture Office, pangulo sa Tourism Office ug Association of Barangay Councils.

Lakip sa miyembro ang Department of Public Works and Highways, Land Transportation Office, Land Transportation Franchising and Regulatory Board, business sector, transport groups ug sa academe o non-government organization.

Matud ni city administrator Nigel Paul Villarete nga mamahimo sila nga policy-making body ug adunay technical working group nga moimplementar sa ilang mga polisiya.

Ang trabaho sa LPTRP mao ang pagkolekta og datos sa pampublikong transportasyon nga makatabang sa pagsusi sa kondisyon sa public transport sa dakbayan, demand sa pasahero ug ang land use ug development  sa dakbayan labi na sa sektor sa turismo, agrikultura ug uban pa.

Dugang ni Villarete nga kinahanglang i-update ang mga rota sa PUJ ilabi na nga paingon nang mosugod ang Bus Rapid Transit Project. (/BDB)(BANATNEWS)