Operasyon sa drug rehab sa Mandaue wala pa masugdi

CEBU, Philippines — Ang drug rehab clinic sa Dakbayan sa Mandaue nga gisubhan niadtong buwan sa Agosto sa nilabay’ng tuig ang wala pa makasugod sa operasyon hangtud karon.

Si Mandaue City Health Officer Dr. Edna Seno nipasabot nga adunay mga kakulian nga padayon pa nilang gihimoan og mga lakang.

Matud ni Seno nga gipaubos karon sa mga pagbansay ngadto sa kaulohan ang mga kawani nga modumala sa nahisgutang drug rehab clinic sa dakbayan.

Ug kong mahuman na sa buwan sa Abril niining tuiga ang pagbansay sa maong mga kawani posibleng makasugod na sa operasyon ang maong drug rehab clinic.

Sa kasamtangan  daghan na sa mga barangay opisyal sa dakbayan ang naghimo og pakisusi  sa tinguha nga ilang  mapadala sa drug rehab clinic sa dakbayan ang mga moderate risk nga  drug addict sa ilang dapit.

Gipasabot ni Seno nga ang ilang pagdawat og mga moderate risk addict sa nagkadaiyang dapit sa dakbayan ang ilang gipaagi sa ilang mga barangay opisyal kinsa maoy mo-endosar alang sa pagpa-rehab niini.

Dugang ni Seno nga  ang ilang gikauyonan sa kapolisan nga  samtang ang drug moderate risk  nga addict nga mobulontaryo sa pagpa-rehab  dili na malakip sa ilang pagahimuon nga anti-illegal drug operation. (BANAT NEWS)