Politiko, kandidato gidid-an paggamit sa programa sa DSWD

CEBU, Philippines — Dili mahimong maapil sa pamolitika o pangampanya ang mga programa ug serbisyo sa Department of Social Welfare and Development (DSWD) nga gigahin alang sa publiko, ilabi na sa mga benepisyaryo niini.

Ang DSWD nga mga empleyado usab dili mahimong mogamit sa mga programa aron makakampanya sa kandidato nga gusto nilang botaran.

Si Rebecca Geamala, DSWD-7 OIC regional director miklaro nga ang mga programa ug serbisyo sa ilang ahensiya wala gipaagi sa mga lokal nga opisyal.

Matud niya nga dili usab mahimo nga makahilabot ang maong opisyal o kandidato kon gamiton man niini ang programa sa DSWD aron makabentaha sa umaabot nga piniliay.

Sigon niya, dili angay mahadlok ang mga benepisyaryo kon ugaling hadlukon sila og opisyal o kandidato nga tangtangon sa listahan sa mga recipient sa programa sa ilang ahensiya. Bugtong ang ilang buhatan ra ang adunay listahan niini ug adunay katungod nga molista ug motangtang sa listahan sa mga benipesyaryo.

Sa kasamtangan, wala pa sila mo-expand sa maong programa sanglit anaa pa ang moratorium nga nagsugod niadtong tuig 2016.

Giawhag ni Geamala ang mga benepisyaryo nga magmatngon sa mga panggamit sa mga kandidato kay gawasnon sila nga makahukom ug makapili sa kon kinsa ang ilang botaran ug makahupot og pwesto sa gobyerno.

Ang DSWD nga mga empleyado sama sa city ug munisipyo, gidid-an usab nga mokampanya o moimpluwensya sa mga benepisyaryo kon kinsa ang botaran karong eleksyon.

Si DSWD secretary Rolando Joselito Bautista mismo ang mimando nga ang pag-apud-apud sa cash grants o pagpahigayon og mga kalihukan himuon sa neutral grounds o venue aron malikayan ang political campaigning. (/DILT)(BANATNEWS)