Balay ni Sabalones sa minglanilla gi-ronda

CEBU, Philippines — Panimay sa giingong drug lord nga si Franz Sabalones gironda sa mga sakop sa Provincial Intelligence Branch (PIB) sa Modena Subdivision, Estaca, Barangay Tunghaan sa Lungsod sa Minglanilla kagahapon sa buntag.

Si Police Major Alejandro Batobalonos armado og search warrant nga giisyu ni Judge Leopoldo Cañete sa Regional Trial Court (RTC) Branch 60 sa Lungsod sa Barili batok ni Franz Cabilao Sabalones tungod sa paghupot og armas.

Ang maong search warrant nag-ingon nga adunay .45 nga pistola nga gihuptan si Sabalones nga kalapasan sa Akta Republika 10591. Wala si Sabalones sa panimay apan naa ang iyang kapuyo nga si Winefreda Misa, 33, taga Sawang Calero ug duha nila ka mga anak nga nagpangidaron og 5 ug 6 anyos.

Giangkon ni Misa nga gipaangkan siya ni Sabalones apan dali ra natapos ang ilang relasyon. Ug unom ka tuig na silang wala magkita apan ang panimay nga ilang gipuy-an, ang inahan ni Sabalones maoy nagtabang kanila og suporta.

Apan pipila ka mga residente sa lugar nga dili magpaila niingon nga adunay katingad-an sa maong panimay. Ilang gitug-an nga aduna gyu’y higayon nga daghang mangabot nga bisita sa panimay ni Sabalones apan lagyo-lagyo sila nga mag-parking sa ilang mga sakyanan.

Matud pa sa kapolisan, nasigpatan si Sabalones nga adunay laing kuyog mga alas 12:17 sa tungang gabii kagahapon apan giingong nianang pagka-alas 2 sa kaadlawon may duha ka tawong nibiya sa balay luwan sa usa ka Vios nga awto.

Nagtuo si Batobalonos nga si Sabalones ang usa kanila.

Sa pagsisik sa balay , dunay nakuha nga KG-9 submachine pistol, M4 rifle, usa ka .45 kalibre nga pistola ug granada lakip na ang mga bala sa ibabaw sa aparador sa masters bedroom.

Apan si Misa nagkanayon nga wala siyay kalibutan kun kinsa ang nagbutang o tag-iya sa maong mga armas.  Si Batobalonos miingon nga si Sabalones lang ang ilang mapasakaan og kaso tungod sa maong mga armas ug Granada ug walay labot si Misa.Samtang si Kapitan Sara Alicaya sa Barangay Tunghaan kinsa maoy testigo sa maong pagronda niangkon nga wala gyud sila masayod sa presensya ni Sabalones sa ilang lugar.

Matud ni Alicaya ang subdivision wala pa nalakip sa ilang purok system mao nga wala pa sila makaila sa mga namuyo niini.

Ang drayber ni Misa nga dili magpaila nakurat ug nabalaka sa iyang nasudlang trabaho. Matud niya ang iyang nailhang amo mao lang si Misa.

“Kuyawan ko ani sir uy. Kun mao man gani ni huwat lang ko ani ni maam nga kung undang ko moundang ko uy kay kuyawan ko og ingon ani,” nagkanayon ang drayber.Si Mayor Elanito Peña sa lungsod sa Minglanilla personal sab nga nisusi sa panimay ug siya nalipay nga dali ra nahibaw-an ang lugar nga bisitahan ni Sabalones. (/IBM)(BANATNEWS)