Karaang miyembro lang sa habal-habal hatagan og bugas — Cuizon

CEBU, Philippines — Gipahibawo ni Cebu City assistant administrator Annabeth Cuizon nga adunay instruction si Mayor Tomas Osmeña nga dili na sila modawat og application alang sa rice assistance sa mga habal-habal kinsa bag-o lang nga nagpamiyembro sa asosasyon.

 Ang gikonsiderar nga bag-ong miyembro sa habal-habal associations kadtong nagpamiyembro sugod niadtong Pebrero 23 nga maoy unang hugna sa distribution sa tagsa ka sakong bugas.

Ug ang siguruhon sa siyudad kadtong miyembro na gyud daan sa wala pa nila gipahibawo nga ang dakbayan manghatag og tagsa ka sakong bugas isip tabang kanila dihang gisuspenso sa Korte Suprema ang operasyon sa Angkas lukop nasud.

Aron masuta nga bag-o o karaan ang miyembro sa asosasyon sa habal-habal adunay field officers nga mo-verify ug motan-aw sa application.

Samtang giklaro usab ni Cuizon nga ang nakalatid sa Executive Order no. 45 ni Osmeña nga kadtong mapakyas pag-claim sa bugas sulod sa 15 ka adlaw human sa distribution ma-forfeit kini. Dugang ni Cuizon nga dili pa sila maka-cut off sa 15 days tungod kay nagsige pa sila og distribute og bugas ug aron usab paghatag og lugway sa uban nga wala pa maka-comply sa rekisitos.   BDB (BANAT NEWS)