2,000 ka pamilya duol sa sapa balhinon

CEBU, Philippines — Nikabat ngadto sa 2,000 ka pamilya nga nagpuyo diha duol sa sapa sa Dakbayan sa Sugbo ang ibalhin sa luwas nga lugar.

Si Konsehal Eugenio Gabuya, Jr., chairman sa committee on housing nibutyag nga ang siyudad padayon nga nag-evaluate sa relocation site sa Barangay Inayawan ug Quiot nga balhinan sa mga pamilya gikan sa nagkalain-laing barangay.

Niadtong tuig 2017, ang Department of Public Works and Highways (DPWH)-7 nakig-alayon sa opisyales sa siyudad subay sa ilang tinguha nga implementasyon sa P1.15 bilyon nga dredging, de-silting ug de-clogging projects sa Dakbayan sa Sugbo.

Sa P1.15 bilyon, ang DPWH dunay P730 milyones ubos sa 2016 budget ug laing P420 milyones ubos sa 2017 budget alang sa kasapaan ug estero sa siyudad.

Ang operations head sa Division for the Welfare of the Urban Poor(DWUP) Genevieve Alcoseba nagkanayon nga ang maong flood control project nga ipatuman pinaagi sa phases wala kini mapadayon niadtong 2018 tungod kay si Mayor Tomas Osmeña nangayo og budget alang sa relocation site sa mga apektadong  pamilya.

Nunot niini, ang DPWH nitagana og P140 milyones nga budget alang sa relocation sa mga apektadong pamilya.

Sa pagkakaron ang DPWH nagsugod na sa phase I sa proyekto nga naglangkub sa restoration ug rehabilitation sa Kinalumsan River ug Guadalupe River.

Sa Kinalumsan River cover niini ang 80 ka estraktura diha sa kasapaan sa Barangay Duljo-Fatima ug Mambaling.

Ang first phase sa P1.15 billion project naglangkub sa Guadalupe River nga makaapekto sa Barangay Pasil ug Ermita.

Dugang ni Alcoseba nga ang proyekto magsugod sa mga umaabot nga mga buwan diin moabot sa 100 ka estraktura ang maapektohan.  BDB (BANAT NEWS)