Tag-iya, empleyado sa piggery gi-release sa NBI
CEBU, Philippines — Temporaryong gawasnon ang tag-iya sa Multi-farms Agro Industrial Corporation ug ang tulo ka empleyado niini human sila nibayad og piyansa sa kasong gipasaka batok kanila nga kalapasan sa Philippine Clean Water Act and Philippine Fisheries Code.
Niadtong Miyerkules ang mga sakop sa National Bureau of Investigation (NBI) nipasaka sa nahisgutang kaso diha sa piskaliya batok sa tag-iya sa maong piggery farm nga si Santiago Tan Chan, III ug empleyado niini nga sila si Rosalio Aguanta, Jayson Fritz Aguanta ug Jeramil Sabala. Sa inquest proceeding si Tan Chan, Rosalio, Jayson ug Sabala inabagan sa ilang abogado nipili nga atubangon ang kaso ngadto sa korte ug dili na sila mosumiter sa ilang counter-affidavit.
Si State Prosecutor Ryan Gingoyon nirekomenda sa pagpasaka og kasong kalapasan sa Akta Republika 9275 kun “Philippine Clean Water Act” diin ang mga suspetsado pabayaron og P24,000 nga piyansa; Akta Republika 8550 kun “The Philippine Fisheries Code of 1998” diin pabayaron sila og P48,000 nga piyansa alang sa ilang temporaryong kagawasan.
Si assistant regional director Dominador Cimafranca sa NBI-7 nagkanayon nga silang Tan Chan, Rosalio, Jayson ug Sabala gibuhian nila kini niadtong Miyerkules sa gabii human nakabayad og piyansa. Gikataho nga ang maong piggery farm nag-operate kini sukad pa niadtong 1970’s matud ni Lieutenant Junior Grade Michael John Encina, operations officer sa Philippine Coast Guard-7.
Ang PCG lakip sa nipahigayon sa operasyon batok sa piggery farm. BDB (BANAT NEWS)
- Latest
