Pagdawat og sweldo ni Cuenco gikwestyon

CEBU, Philippines — Ang konseho sa Siyudad sa Sugbo nangayo og opinyon sa mga hingtungdan nga ahensiya aduna ba’y katungod si Konsehal James Anthony Cuenco sa pagproseso ug pagdawat sa iyang backwages ug uban pang mga benepisyo.

Niadtong Martes, ang mga sakop sa legislative body nakahukom nga mangayo sa opinyon sa City Budget Office, Department of Interior and Local Government, ug sa Human Resource Development Office.

Kini human sa sulat ni Cuenco nga naghangyo sa buhatan sa Secretariat sa pagproseso sa iyang suweldo nga gipresentar sa konseho sa dakbayan alang sa deliberasyon ug pag-uyon.

Apan, ang mga konsehal dili sigurado kun si Cuenco may katungod pagdawat sa iyang backwages ug mga benepisyo tungod kay gipulihan man siya sa kanhi gitudlo nga konsehal Erik Miguel Espina sa iyang suspension niadtong 2017.

Kahinumduman, sa Oktubre 2017, ang Ombudsman nisuspenso kang Cuenco mahitungod sa iyang giingong kalambigitan sa sayop nga paggamit sa P3.3 milyones nga Priority Development Assistance Fund (PDAF) sa iyang amahan, kanhi south district congressman Antonio Cuenco.

Niadtong Enero 3, Cuenco mibalik sa katungdanan human sa reinstatement order gikan sa DILG kaniya.

Si Konsehal Jocelyn Pesquera nga usa ka abogado niingon nga si Cuenco aduna’y katungod sa pagdawat sa iyang backwages ubos sa kasamtangan nga mga balaod.

“Per law, anybody when there is a reinstatement, the person is entitled to whatever amount that was due to him,” matud pa niya.

Si Bise Mayor Edgardo Labella uyon sa sugyot nga ipangutana kini sa ubang ahensya tungod kay balido man ang pagkwestyon niini.

“Because I think, if there is an exoneration of an administrative infraction the respondent in many cases is entitled to backwages considering that in this particular case, there is another replacement who received the salary,” suma pa niya. Sa iyang bahin, si Cuenco andam sa pagsunod sa bisan unsa nga mahimong sa desisyon sa mga hingtungdan nga mga ahensiya.

Ang DILG-Cebu City officer-in-charge nga si Emma Joyevelyn Calvo misaysay sa Banat News nga mokonsulta usab sila sa ilang legal officer karong Martes. (/IBM)(BANATNEWS)