Anak posibleng ika-tandem ni Reluya

CEBU, Philippines —  Nahimong mensahe ni San Fernando Mayor Lakambini “Neneth” Reluya ngadto sa iyang mga kaatbang sa politika nga hatagan usa siya og higayon nga ipakita ang katakus sa pagdala sa renda sa pangagamhanan sa lungsod kay andam siyang mobiya niini kon wala siyay nahimo.

Ang maong mensahe giluwatan ni Reluya sa unang higayon nga nakigtagbo kini sa mga sakop sa media sukad kini gibanhigan niadtong Enero 22 diin namatay sa maong insidente ang iyang bana nga si ABC president Ricardo “Nonoy” Reluya ug duha pa ka mga kauban.

Kini nagkanayon ngadto sa iyang mga kaatbang nga kon tinguha man diay nila nga mohupot sa renda sa pangagamhanan sa San Fernando, kadto pa untang wala pa molambo ang ekonomikanhong aspeto niini nga karon natagamtaman na sa katawhan ubos sa iyang pagdumala.

Gibutyag sa mayor nga ang kampanya karon igo nalang sa pagtaho ngadto sa katawhan sa iyang mga nahimo ug daghan ang pamaagi niini sama sa pagpakita ngadto sa katawhan, pag-adto sa mga lugar ug sa social media.

Si Reluya kinsa magpasubli pagka mayor mitug-an nga bugtong gihuptan niya karon mao ang mga mithi nga gibilin sa iyang bana nga buot niyang ipadayon.

Nunot niini, adunay mga hugon-hugon nga usa sa mga anak sa mayor maoy mohulip sa ilang amahan nga magpapili pagka bise mayor.

Si Mayor Reluya wala mihimakak niini apan kini mitug-an nga wala pa nila kini hunahunaa sanglit prayoridad nila karon ang pagpangita og hustisya sa kamatayon sa iyang bana. Iya ra usab agdon ang iyang mga anak kon unsay desisyon nila.

Samtang si Talisay City Mayor Eduardo Gullas, ang lider sa grupong Alayon mitataw nga ilang gihatagan og higayon si Reluya nga mopuli kon kinsa ang iyang nga ika-tandem. Giingong daku ang purohan nga ang usa sa duha niini ka mga anak maoy mopuli sa ilang amahan.

Dugang niini nga ang suporta sa Alayon anaa ni Mayor Reluya kinsa ilang gihulagway nga isug nga pagkababaye.  Gabriel C. Bonjoc DILT (BANATNEWS)