‘River for Life’ ipahigayun sa Pebrero 22
CEBU, Philippines — Nunot sa mga kalihukan sa pagsalbar ug paglimpyo sa mga kasapaan, adunay ipahigayon nga nationwide simultaneous “River for Life” clean up program nga pagahimuon karong Pebrero 22.
Si Jose Cleo Cary Colis, officer sa Provincial Environment and Natural Resources (PENRO) sa probinsiya sa Sugbo nagkanayon nga sa Pilipinas adunay 28 ka major river basins o dagko nga sapa ug adunay 421 nga principal rivers o gagmay’ng sapa.
Si Colis miingon nga sa tuig 2017, adunay na-classify nga 337 principal rivers ug ang classification niini kay naa sa class C o luwas para sa recreational activities sama sa boating ug fishing apan dili pwede nga kaliguan.
Si Engr. Cindylyn Ochea, Chief sa Environment Education and Information Unit sa Environmental Management Bureau 7 (EMB-7) miingon nga adunay lain-laing water usage and classification gumikan kay aduna kini lahi-lahi nga beneficial use.
“Nganung naay classification? Tungod kay gusto ta nga proteksiyunan ang atong katubigan and at all times ma-meet ang intended beneficial use,” matud pa ni Ochea.
Sa laing bahin, ang Cebu City Environment and Natural Resources Office (CCENRO) mi-isyu og citation ticket sa unom ka firms nga matud pa nilabay og waste water sa Bulacao River.
Ang pangulo sa CCENRO nga si Nida Cabrera miingon nga ang maong mga firms nibayad og P1,000 isip penalty alang sa first offense subay na sa kalapasan sa City Ordinance No. 2398 kun Septage Management Ordinance.
“Amo na silang gipatawag. 14 ka establishments ang among gipatawag pero unom ra among na-isyuhan og citation ticket kay wala pa namo masakpi ang uban nga naglabay gyud og waste water ug laing garbage sa atong sapa”, matud ni Cabrera. — Joevelon G. Pinay, USJ-R Intern LPM (BANAT NEWS)
- Latest
